Gjyqi ndaj Sean “Diddy” Combs vazhdoi deri të premten në gjykatën federale të Manhattan-it, ku “Jane”, një pseudonim për një viktimë të dyshuar dhe ish-e dashura e P. Diddy-t, u rikthye në sallën e gjyqit për të dëshmuar në çështjen e profilit të lartë për trafikim seksual.
Dëshmia e Jane gjatë dy ditëve të fundit ka qenë dukshëm e ngjashme me atë të Cassie Ventura, një tjetër ish-e dashur e P. Diddy-t dhe një nga të dyshuarat si viktima të tij.
Jane tregoi se ishte dashuruar kokë e këmbë me P. Diddy-n në muajt e parë të lidhjes së tyre, por dëshmoi se marrëdhënia mori një kthesë në vitin 2021, kur filloi të dominohej nga marrëdhënie seksuale të shoqëruara me drogë, të cilat ajo i quajti “netët në hotel”, dhe për të cilat tha se ndihej e detyruar të merrte pjesë për të kënaqur producentin muzikor.
Pavarësisht ndarjes së tyre dhe arrestimit të P. Diddy-t në shtatorin e kaluar, ajo zbuloi të premten se ai ende po i paguan qiranë.
Avokati i Jane i tha gjykatësit se përdorues të rrjeteve sociale dhe media të ndryshme po përpiqen të zbulojnë identitetin e saj, duke rrezikuar sigurinë dhe privatësinë e saj. Gjykatësi i kërkoi avokatit të identifikojë personat që po përpiqen ta ekspozojnë dhe shtoi se nëse provohet një shkelje, ai do të marrë në konsideratë një “urdhër ndalese për median”.
Prokurorët federalë thonë se për dekada me radhë, P. Diddy ka abuzuar, kërcënuar dhe detyruar gratë të marrin pjesë në maratona seksuale të quajtura “freak offs”, duke përdorur perandorinë e tij të biznesit, si dhe armë, rrëmbime dhe zjarrvënie për të fshehur krimet e tij.
Moguli 55-vjeçar i hip-hopit përballet me pesë akuza penale: një për komplot mafioz (racketeering), dy për trafikim seksual me forcë, mashtrim dhe dy të tjera për transport për qëllime prostitucioni. P. Diddy ka deklaruar pafajësinë. Nëse shpallet fajtor, ai përballet me dënim të përjetshëm.
Pikat kyçe nga dëshmia e së premtes:
Jane tregoi se P. Diddy i paguan ende qiranë
Jane tregoi se në mars 2023, ajo dhe P. Diddy nënshkruan një “kontratë dashurie” dy-vjeçare, sipas së cilës ai do t’i paguante një ndihmë mujore prej 10,000 dollarësh, të cilën ajo e përdorte për të paguar qiranë e një banese të re. Ajo konfirmoi se ai ende po e paguan atë shumë.
“Kush po ta paguan qiranë tani?”, e pyeti prokurorja Maurene Comey.
“Sean,” u përgjigj Jane.
Jane tha se ndihej e “detyruar” të merrte pjesë në “netët e hotelit”, merrte drogë për t’i “bërë më të lehta"
Jane dëshmoi se i kishte thënë shpesh P. Diddy-t, personalisht apo me mesazhe, se nuk dëshironte të kishte marrëdhënie seksuale me meshkuj të tjerë. Por për shkak të varësisë financiare ndaj tij, ajo ndihej e detyruar të merrte pjesë për ta kënaqur.
Për të përballuar “netët e hotelit”, ajo tha se “duhej” të merrte drogë, sepse “thjesht e bënte më të lehtë.” Ajo shpërtheu në lot, duke thënë: “Kur nuk merrja (drogë), gjithçka ndihej shumë reale.”
Në vitin 2023, Jane i kishte shkruar P. Diddy-t se donte të ndalonte “netët e hotelit” dhe se do të dëshironte të ktheheshin në ditët e para të lidhjes së tyre, kur ndihej e lirë dhe e dashuruar.
Jane përshkruan me lot një natë ditëlindjeje, ku u detyrua të kishte marrëdhënie me tre burra
Në vitin 2023, Jane fluturoi për në Miami për të festuar ditëlindjen me P. Diddy-n. Megjithëse i kishte thënë se nuk donte më “netë hoteli”, ai kishte organizuar një të tillë.
“Është ditëlindja jote, le të argëtohemi,” kujtoi ajo se i kishte thënë P. Diddy. Ishte një “moment që nuk e priste”, por “thjesht e pranoi,” nga frika se mos e zhgënjente.
Jane, me lot në sy, tregoi se u ndje si robot, duke kryer marrëdhënie seksuale me tre burra deri në orët e para të mëngjesit, ndërsa P. Diddy shikonte.
Nata më e gjatë e hotelit zgjati 3 ditë e gjysmë
Sipas Jane, nata më e gjatë që ajo përjetoi zgjati rreth 3 ditë e gjysmë, ndërsa më e shkurtra 12 orë, gjatë ndërrimit të viteve në 2022. Ajo qëndroi zgjuar me ekstazi dhe nuk fjeti aspak.
Ky përshkrim përputhet me dëshminë e Cassie Ventura-s, e cila tha se “freak offs” zgjasnin me ditë dhe ajo përdorte drogë për të qëndruar zgjuar.
Jane tha se vuante nga dhimbje shpine dhe infeksione urinare
Jane rrëfeu se vuante nga dhimbje të vazhdueshme në shpinë, infeksione urinare dhe infeksione mykotike pas këtyre netëve. Ajo tha se ishte detyruar të kryente marrëdhënie seksuale para se të shërohej plotësisht.
Kur kërkonte të shtynte “sesionet”, P. Diddy bëhej “i zemëruar, përçmues, tallës dhe e zbraste emocionalisht.”
Edhe Ventura përmendi të njëjtat probleme shëndetësore në dëshminë e saj.
Juria dëgjon një regjistrim nga një “natë hoteli”
Combs i regjistronte këto net në telefonin e tij dhe i thoshte Jane se ishin “vetëm për të.” Ajo tregoi se zakonisht ishte nën efektin e drogës gjatë filmimeve. “Ishte thjesht një pjesë e asaj që ndodhte.”
Në sallë u dëgjua një audio nga një prej regjistrimeve, ku Jane i kërkoi njërit prej meshkujve të përdorte prezervativ. Combs nuk e pëlqeu këtë dhe ndërhyri.
P. Diddy i paguante meshkujt me para cash, të sjella nga stafi
Midis majit 2021 dhe tetorit 2023, Jane tha se Combs mbante para cash në sirtarë të dhomës së hotelit për t’i paguar burrat që merrnin pjesë. Kur paratë mbaronin, ai i thërriste njerëzit e stafit për t’i sjellë më shumë.
Jane tha se transportoi drogë për P. Diddy-n në udhëtime ajrore
Në dy raste, P. Diddy i kërkoi Jane të sillte një pako me drogë nga Kalifornia në Miami, në bagazhin e saj. Ajo përshkroi ankthin që ndjeu duke futur pilula në një fluturim komercial. Kur u ankua, shefja e stafit të P. Diddy-t, Kristina Khorram, i tha: “Është në rregull, unë e bëj gjithmonë.”
Jane dëshmoi se ia dorëzoi drogën P. Diddy-it dhe më pas përdorën një pjesë së bashku.
Në thelb, prokurorët po përpiqen të provojnë se marrëdhënia mes Jane dhe P. Diddy-t kaloi nga një lidhje romantike në një model abuzimi, manipulimi dhe detyrimi për seks e trafikim droge. Provat e Jane janë pjesë kyçe për të mbështetur akuzat për komplot kriminal dhe trafikim seksual kundër Sean “Diddy” Combs.
Artikuj të sugjeruar:
Burimi: Yahoo News
