Billy Joel ka tentuar të kryejë vetëvrasje dy herë pasi pati një marrëdhënie sekrete me gruan e shokut të tij të ngushtë, Jon Small. Këngëtari i “Piano Man”, foli hapur për këtë periudhë të dhimbshme të jetës së tij “Billy Joel: And So It Goes”.

Ai rrëfeu se ishte “i dashuruar” me Elizabeth Weber, gruan e mikut të tij, anëtarit të grupit Attila, ndërkohë që jetonte në shtëpinë e tyre. Joel ka jetuar në shtëpinë e Jon Small kur ka qenë në të 20-at e tij.

“Unë dhe Billy kalonim shumë kohë bashkë,” tha Weber për romancën e tyre, e cila nisi dhe u zhvillua ngadalë.

Kur tradhtia doli në dritë, Joel u ndje “jashtëzakonisht fajtor” dhe “si një shkatërrues familjesh”, veçanërisht sepse çifti “kishte një fëmijë”. Muzikanti ndjeu se e “meritonte” kur Small, i shokuar nga tradhtia, e “qëlloi me grusht në hundë”.

Joel ishte gjithashtu “shumë i mërzitur” dhe “pa vend për të jetuar”, ndaj filloi të “flinte në lavanderi”.

Ai u shpreh ndër të tjera:

“Isha në depresion, besoj deri në pikën e çmendurisë. Mendoja: “Kaq ishte. Nuk dua të jetoj më”. Isha duke ndjerë shumë dhimbje dhe mendoja se përse të vazhdoja. Më dukej çdo ditë njësoj. Thoja: “Nesër do të jetë njësoj si sot dhe dita e sotme është e tmerrshme. Kështu që mendova t’i jepja fund gjithçkaje”.

Kur motra e tij, Judy Molinari, i dha qetësues për ta ndihmuar të flinte, Joel “i piu të gjitha”. Molinari, me lot në sy, u shpreh:

“Ai ishte në koma për ditë të tëra. Shkova ta shihja në spital dhe ai ishte i shtrirë, i bardhë si një çarçaf. Mendova se e kisha vrarë.”

Joel tentoi të vriste veten për herë të dytë – dhe këtë herë ishte Small ai që e çoi në spital.

“Edhe pse miqësia jonë po shkatërrohej, Jon më shpëtoi jetën,” tha kompozitori me emocion.

Më pas ai u shtrua me dëshirë në një pavion vëzhgimi dhe kuptoi se mund të “përdorte të gjitha ato emocione për t’i kthyer në muzikë.”

Jon Small e fali Billy Joel, i cili më vonë u lidh sërish me Weber dhe u martua me të. Ata qëndruan bashkë për 9 vite, në periudhën 1973-1982. Pianisti u martua edhe tre herë të tjera me Christie Brinkley, Katie Lee dhe bashkëshorten aktuale, Alexis Roderick.

Rishtazi, Joel ka zbuluar se vuan nga një sëmundje e rrallë e trurit.

Sa i përket dokumentarit “Billy Joel: And So It Goes”, do të transmetohet këtë verë në HBO Max.