Nëse dikush si The Wizard Liz – e fuqishme, e bukur, e vetëdijshme dhe me kufij të qartë – mund të tradhtohet, çfarë shprese kemi ne të tjerët? Kjo është pyetja që ngritën shumë vajza kur u njohën me historinë e influencueses që ka bërë xhiron e rrjetit ditët e fundit.

Prej ditësh, rrjetet sociale janë "përflakur" nga lajmi se Liz, YouTuber-ja e njohur për videot vetëndihmuese dhe që promovonte pavarësinë e vajzave dhe grave, është tradhtuar nga i fejuari i saj, Landon Nickerson – ndërkohë që është shtatzënë në muajin e katërt.

Për shumë ndjekës të saj, kjo nuk është thjesht një ndarje publike. Kjo është një goditje personale. Liz ka qenë simboli i një gruaje që ka bërë "punën e brendshme", që vendos standarde të larta dhe nuk pranon më pak se sa meriton. Dhe tani, ky zhgënjim ndjehet si një thyerje kolektive, si një provë e dhimbshme që ndoshta askush nuk është vërtet "i sigurt".

Por pse kjo histori po prek kaq shumë njerëz, përtej ndjekësve të saj më të afërt?

1. Sepse goditi fort bindjet tona për dashurinë dhe shërimin emocional

Liz ka qenë shembulli i gjallë se puna me veten, vlerësimi personal dhe kufijtë emocionalë sjellin marrëdhënie më të shëndetshme. Kështu që, kur ajo – nga të gjitha gratë – u tradhtua, shumë njerëz ndjenë sikur po shembej vetë ideja që shërimi të mbron nga dhimbjet.

Një studim i vitit 2024 në Psychology of Popular Media analizoi pikërisht këtë: si ndikon një tradhti nga një personazh publik te emocionet e ndjekësve. Dhe rezultatet treguan se sa më shumë dikush beson në dashuri ideale apo "shpirtra binjakë", aq më e fortë është dhimbja që përjeton kur ndodh një tradhti, edhe nëse është vetëm një lidhje "parasociale" – pra, një lidhje që ekziston vetëm në mendjen e ndjekësit.

Në rastin e Liz, ajo ishte më shumë se një influencuese: ishte dëshmia që "vajzat e forta nuk tradhtohen". Prandaj, kur kjo ndodhi, për shumë gra dhe vajza, ndjenja ishte: Nëse edhe ajo u tradhtua, atëherë çfarë shprese kemi ne?

Por e vërteta është kjo: puna me veten nuk të shpëton nga dhimbjet, por të jep forcën për t’i përballuar ato me dinjitet. Dhe këtë e tregoi edhe vetë Liz. Ajo nuk u përpoq të arsyetonte apo të mbulonte tradhtinë – por doli publikisht, me zë të fortë dhe me krenari.

2. Sepse shkatërroi iluzionin e "partnerit të sigurt"

Landon ishte parë nga shumë si “flamur jeshil”. Ai dukej i dashur, mbështetës, i pranishëm emocionalisht – një partner model. Dhe ndarja e tyre i bëri shumë ndjekës të ndihen të zhgënjyer, madje të tradhtuar nga vetë ideja e marrëdhënieve të sigurta.

Ky është efekti i asaj që studiuesit e quajnë “para-loveshock” – një tronditje emocionale e krahasueshme me një ndarje reale, edhe pse ndodh me figura publike. Dhe reagimet janë të shumta: që nga hidhërimi, te vetëfajësimi e deri te zemërimi i hapur ndaj personazhit që "zhgënjeu".

Në rastin e Liz, shumë ndjekës ndihen sikur janë ndarë vetë – sepse kishin vendosur shpresa dhe fantazi mbi atë lidhje. Dhe nëse ai ishte “partneri i ëndrrave” dhe sërish tradhtoi, atëherë çfarë do të thotë të jesh i sigurt në dashuri?

Çfarë mund të mësojmë nga kjo histori?

Në vend që ta përdorim këtë histori për të ushqyer dyshimet tona ndaj dashurisë, burrave apo vetes, mund ta përdorim si një pasqyrë për të reflektuar. Ja disa të vërteta që mund të nxjerrim nga kjo situatë:

- Asnjë marrëdhënie nuk është e përsosur, sado ideale të duket nga jashtë.

- Asnjë grua nuk është "imune" ndaj dhimbjes, edhe nëse është e bukur, e zgjuar apo e vetëdijshme.

- Tradhtia nuk ndodh për shkakun tënd – por për shkak të atij që vendosi të tradhtojë.

Në fund të fundit, është mirë të kujtojmë: Edhe gratë më të forta përjetojnë plagë. Por forca e tyre nuk është mungesa e dhimbjes – është mënyra si e përballojnë atë.

Liz ka ndarë së fundmi një moment gjatë ekografisë së bebit të saj, që është një djalë. Ajo i shoqëroi fotot me mbishkrimin "Bekimi i vogël i mamit" dhe falenderoi Zotin për të birin e saj.

Artikuj të sugjeruar:

_{Burimi: Forbes}