Në një intervistë së fundmi për The New York Times, në serinë e podkasteve “The Interview”, Miley Cyrus foli hapur për qëndrimin e saj ndaj mëmësisë dhe arsyet pse nuk e sheh veten si nënë, të paktën për momentin.

“Njerku im një ditë më pyeti: ‘Pse je e vetmja që nuk ka linjën e vet të grimit?’ Dhe unë iu përgjigja: ‘Sepse nuk është pasioni im.’ Ai më tha: ‘Kjo është përgjigjja e duhur.’ 

Ndihem njësoj edhe për mëmësinë. Nuk ka qenë kurrë diçka që më ka emocionuar në mënyrë shumë të veçantë. Sjell shumë përgjegjësi, do përkushtim dhe energji.

Dhe nëse nuk emocionohesh vërtet për të, nuk e di si mund t’i përballosh netët pa gjumë dhe gjithçka që ka kaluar nëna ime për 18 vjet. 

Madje, kur them 18 vjet, në fakt e kam fjalën për 33, sepse unë ende ndihem si një fëmijë. Thjesht, nuk e kam ndjerë kurrë këtë emocion (dëshirën për të bërë fëmijë).”

Ky qëndrim i saj nuk është i panjohur. Në një intervistë të mëparshme në vitin 2020, këngëtarja tha:

“Nuk gjykoj askënd që dëshiron të ketë fëmijë. Thjesht, për mua personalisht, nuk është përparësia ime në këtë fazë të jetës.”

Me fjalë të tjera, Miley Cyrus, është një grua si shumë të tjera që në intervista, dhe jo vetëm, pyetet se përse nuk ka bërë ende fëmijë. Në fakt, një vendim i tillë është shumë personal, ndaj njerëzit duhet të shmnagin të tilla pyetje dhe të kuptojnë që askush s’duhet gjykuar apo këshilluar në këtë aspekt.

Dhe po, ka gra që nuk duan të bëjnë fëmijë. Për aq kohë sa është zgjedhje e tyre, s’duhet të jetë problemi i askujt.

Artikuj të sugjeruar: