Neda Balluku mori gjithë kohën e botës, hapi kamerën e telefonit dhe xhiroi veten duke cekur një tematikë që rrallëherë diskutohet, ose edhe kur ndodh, nuk thellohet.
“A ka mundësi të mos ua lini prindërve tuaj kalamajtë se ua nxitë jetën. Po ua merrni edhe ato pak vite që iu kanë ngelur për të jetuar sepse kanë vuajtur me prindërit e tyre, familjet e tyre, të gjithë të varfër, pa asnjë lloj mundësie. U ka dalë shpirti t’ju rrisin juve, tani duhet të rrisin dhe kalamajtë tuaj. Mbajini vetë kalamajt, çojini në çerdhe dhe shkolla”, thotë Neda ndër të tjera dhe sigurisht, siç ndodh zakonisht, njerëzit komentuan dhe shumica prej tyre, nuk janë dakord.
Të tjera komente i lexoni në postim.
View this post on Instagram
Neda shkroi gjithashtu në mbishkrimin e videos se jemi “brez egoist” dhe se “bëjmë fëmijë që të na i mbajë plaka” (plaka – mami).
Opininonistja e “BBVA 4” mund të ketë deri diku të drejtë, në rastet kur ne tregohemi vërtet egoistë dhe përfitojmë nga dashuria dhe mirësia e gjyshërve dhe “ua ngecim” kalamajtë tanë, por në situatat e tjera, duke marrë parasysh edhe kulturën shqiptare, patjetër që gjyshërit kontribuojnë pozitivisht në rritjen e fëmijëve.
Besojmë i keni dëgjuar gjyshërit kur ju thonë “mjalti i mjaltit” për nipin/mbesën dhe në fakt, afërmendsh, ata i duan shumë nipërit dhe mbesat dhe mërziten nëse nuk ua çon dhe nuk i lejon të shpenzojnë kohë me ta.
Rritja e fëmijëve me gjyshërit sjell shumë përfitime, si për fëmijët, ashtu edhe për prindërit. Duke lënë mënjanë arsyen e zakonshme “gjyshi/ja mban nipin/mbesën se prindërit janë në punë”, si dhe faktit që jemi shqiptarë dhe gjyshërit i kanë fëmijët e vegjël pikë të dobët dhe bëjnë gjithçka për ta, ka të tjera avantazhe për fëmijën.
Mëson për vlerat dhe trashëgiminë e familjes
Çdo gjysh/e vdes të tregojë më shumë mbi fëmijërinë e tij/saj, apo të fëmijëve të tyre, duke forcuar kështu ndjesinë e familjes, vlerave të përcjella ndër breza, si dhe duke krijuar krenarinë për identitetin. Me gjithë historitë, vuajtjet dhe sfidat, kur një fëmijë dëgjon nga gjyshi/ja histori të vërteta, të cilat tregojnë sa njerëz të fortë dhe shpirtmirë janë, përjeton një ndjesi të bukur familjare.
Dashuri dhe përkujdesje pa kushte
“Nëna, do më bësh trahana?”, lexoje me zërin tënd si fëmijë dhe kujtohu se si gjyshja të gatuante me shumë dashuri çdo gjë, me kushtin e vetëm: që ti ta haje. Gjyshërit shërbejnë si mburojë edhe kur nxehen prindërit; janë të duruar me nipërit dhe mbesat dhe thjesht shijojnë aktet e dashurisë që bëjnë për ta.
Zhvillimi emocional
Fëmijët që kanë një marrëdhënie të afërt me gjyshërit shpesh janë më të empatikë dhe të qetë emocionalisht. Ata ndihen më të mbështetur, më të kuptuar, si dhe shpeshherë dinë si të trajtojnë “ndjesitë e mëdha” si dhimbja apo dëshpërimi.
Mësimi nga përvoja jetësore
Gjyshërit kanë përvojë dhe mençuri që vjen nga jeta dhe vuajtjet që mund të ketë sjellë sistemi i kaluar. Ata mund të japin këshilla të vlefshme dhe shembuj të mirë për mënyrën si të përballohen vështirësitë apo të merren vendime.
Pra, është shumë e thjeshtë të thuash që “po ua nxijmë jetën gjyshërve”, por në praktikë, mendojmë se më shumë u nxihet jeta kur privohen nga dashuria e nipërve dhe mbesave. Gjithë çfarë Neda thotë në video mund të zgjidhet fare mirë, përmes një komunikimi të hapur dhe të sinqertë mes prindërve dhe gjyshërve, në mënyrë që në familje të ketë veç lumturi dhe aspak ndjesi negative.
