Boksierja algjeriane Imane Khelif, e cila shkëlqeu në Lojërat Olimpike “Paris 2024” duke fituar medaljen e artë në kategorinë e femrave, po përballet tani me një hetim të ndjeshëm dhe shumë të diskutuar. Organizata ndërkombëtare e boksit “World Boxing”, e njohur zyrtarisht nga Komiteti Olimpik Ndërkombëtar (IOC), ka urdhëruar një test të detyrueshëm gjinor ndaj saj, pas akuzave dhe dyshimeve të ngritura nga disa prej kundërshtareve, të cilat pretendojnë se Khelif nuk duhet të garojë në kategorinë e grave.
Vendimi vjen në një kohë kur “World Boxing” ka bërë të ditur se ndodhet në "fazat përfundimtare" të zbatimit të testimeve të detyrueshme gjinore për të gjithë sportistët që marrin pjesë në garat e saj. Ky njoftim ka ngjallur shumë debate sa përket privatësisë, të drejtave të atletëve dhe kufijve të përcaktimit biologjik të gjinisë në sport.
Gjatë Olimpiadës, Khelif u përball me polemika të ashpra pas publikimit të një raporti mjekësor që pretendonte se ajo ka kromozome XY (kromozome të seksit mashkull). Si kundërpërgjigje, ajo ndërmori veprime ligjore ndaj autoriteteve franceze për shpifje, abuzim dhe ngacmim online.
“Unë kam të gjitha kualifikimet për të marrë pjesë në këtë konkurs, unë jam grua. Linda grua, jetova si grua dhe luftova si grua,” deklaroi ajo pas triumfit. “Suksesi shpesh sjell armiq, dhe kjo i jep medaljes sime një shije edhe më të veçantë.”
Rasti i saj ka rikthyer në qendër të debatit botëror çështjen e ndjeshme të përfshirjes së sportistëve me gjini të diskutueshme ose të ndryshme në gara të ndara sipas gjinisë biologjike.
Artikuj të sugjeruar:
