Në festivalin e djeshëm të Keinemusik, shumë njerëz që na pushtuan Instagram-in, kishin vendosur simbolin e DJ-ve të njohur: shallin në kokë. Ti mund ta kesh parë te Rihanna, A$AP Rocky apo Hailey Bieber, por në fakt, për Keinemusik, (Rampa, Adam Port dhe \&ME), shalli në kokë lidhet me unitetin, të qenit pjesë e një komuniteti, stilin, estetikën dhe frymëzohet gjithashtu nga kultura të tjera
Vendosja e një shalli në kokë është kthyer në një element të përbashkët, i cili të bën pjesë të komunitetit dhe ‘valës’ Keinemusik. Ky aksesor është krijuar si një estetikë e dallueshme, pasi sipas stilit ‘Keinemusik’, në koncertet e tyre mund të shfaqesh me veshje të gjera, kapele, syze, sigurisht, edhe me shallin në kokë, i cili është bërë një tendencë e përhapur, falë videove virale të Keinemusik në Tulum, Ibiza etj.
Gjithashtu, mbajtja e shallit në kokë është edhe një trik për t’u mbrojtur nga pluhuri dhe lidhet me estetikën e festivaleve si 'Burning Man', por ka edhe një qasje më bohemiane dhe tribale (si homazh për kulturat e tjera). Në festa të mëdha, ku ka shumë drita, tym, njerëz, cigare dhe pluhur, mbrojtja e kokës me shall është një zgjedhje stylish dhe praktike.
Pak informacion për Keinemusik
Keinemusik (në gjermanisht 'no music') është një label gjerman i muzikës elektronike, i cili përfshin DJ dhe producentë muzikorë si Adam Port, \&ME (emri i vërtetë: André), Rampa (emri i vërtetë: Gregor), si dhe artisten Monja Gentschoë, e cila krijon pamjet vizuale dhe ilustrimet.
Keinemusik u themelua në Berlin në vitin 2009. Deri më tani janë publikuar mbi 60 materiale muzikore. Në vitin 2017 u publikua albumi debutues "You Are Safe", i prodhuar dhe shkruar nga Adam Port, \&ME dhe Rampa, me pjesëmarrjen e artistëve Chiara Noriko, Nomi Ruiz dhe Jennifer Touch. Në nëntor të vitit 2021, u publikua albumi tjetër "Send Return”, që përfshin bashkëpunime me artistë si Solomun, RY X dhe Little Dragon.
Keinemusik është i njohur ndërkombëtarisht dhe në fushën e muzikës elektronike (techno dhe house). Anëtarët e label-it kanë performuar si DJ në skena ndërkombëtare, duke prekur edhe skenën gjigante të Tomorrowland në vitin 2021.
