Menstruacionet, kjo tematikë me kaq shumë mite dhe çudira! Sot, për fatin tënd (dhe tim) të keq, jemi këtu për të thyer një tjetër mit: Atë të sinkronizimit të menstruacioneve me miken, motrën, kushërirën (shpresojmë jo me vjehrrën).
“Mbaj mend që e dëgjoja këtë nga familjarët kur isha më e re,” thotë Dr. Rachel Jensen, Darney-Landy nga “American College of Obstetricians and Gynecologists”. Jensen shprehet se e kupton pse ky besim është kaq popullor:
“Ideja që trupat tanë do të sinkronizoheshin me ata që jemi afër është ngushëlluese dhe lidhëse, por trupi nuk funksionon me të vërtetë në këtë mënyrë”.
Pra, a është i vërtetë sinkronizimi menstrual?
Jo! Kjo ide fitoi shumë vëmendje në fillim të viteve 1970, kur Dr. Martha McClintock publikoi artikullin e parë shkencor mbi sinkronizimin menstrual. Aty ajo vëzhgoi studente që jetonin në një konvikt kolegji dhe arriti në përfundimin se gratë që jetojnë pranë njëra-tjetrës ose ndajnë një ambient të përbashkët përjetojnë një përputhje të cikleve të tyre menstruale. Ky u bë e njohur si “Efekti McClintock”.
Disa studime pasuese në vitet 1990 konfirmuan gjetjet e McClintock.
Disa sugjeruan se kjo përputhje mund të jetë rezultat i “sinjaleve olfaktive” ose feromoneve që përshpejtojnë ose vonojnë ciklin menstrual. Por, studimet më të fundit, që janë “më rigorozisht të dizajnuara”, “nuk kanë treguar asnjë sinkronizim midis cikleve menstruale të grave që jetojnë bashkë,” thotë Dr. Jewel Kling, kryetare e shëndetit të grave në “Mayo Clinic”, Arizona. Dhe kërkimi nuk ka treguar se si trupi mund të shkaktojë këtë efekt.
“Nuk ekziston një mekanizëm biologjik për sinkronizimin menstrual,” thotë Jensen.
Pse besojnë kaq shumë njerëz në sinkronizimin menstrual?
“Shumë gra mendojnë se kjo është e vërtetë,” thotë Dr. Salena Zanotti, OB-GYN në Cleveland Clinic. "Nëse duket sikur periudhat e njerëzve po sinkronizohen, ky është rezultat i paragjykimeve të informacionit dhe statistikës, jo i biologjisë".
Ne kemi më shumë gjasa të dimë dhe të kujtojmë kohën e menstruacioneve të atyre që jemi afër, thotë Jensen. Kjo do të thotë se nëse ciklet tona përputhen, kemi më shumë gjasa që ta vëmë re. Duke qenë se ciklet menstruale ndryshojnë në kohë dhe interval, është e mundur që ciklet e dy personave të përputhen në një moment, thotë Jensen:
“Studimet tregojnë se ciklet sinkronizohen me të njëjtin ritëm siç do ta prisnim sipas probabilitetit matematikor për shkak të rastësisë.”
Çfarë ndikon në kohën e ciklit menstrual?
Shumë faktorë ndikojnë në kohëzgjatjen dhe kohën e ciklit menstrual, thonë ekspertët. Këta përfshijnë:
- Trupi, sigurisht: Një BMI e lartë lidhet me cikle të parregullta, thotë Kling.
- Mosha: “Menstruacionet mund të jenë të parregullta tek adoleshentet dhe tek personat pranë menopauzës”, thotë Jensen.
- Stresi psikologjik: Depresioni mund të prishë ciklin e dikujt.
- Përdorimi i ilaçeve të ndryshme dhe kontraceptivëve.
- Gjendjet mjekësore, si sëmundjet e tiroides, sindroma policistike ovariane ose menopauza.
- Faktorët e stilit të jetesës, si pirja e duhanit, alkooli dhe kafeina, dieta dhe aktiviteti fizik.
