Deborra-Lee Furness, ish-bashkëshortja e Hugh Jackman, ka folur për herë të parë për arsyen e ndarjes miqësore të dyshes 2 vjet më parë. Ajo u shpreh se tradhtia ishte arsyeja dhe reflektoi mbi traumën e një përvoje të tillë.
“Zemra dhe mbështetja ime shkon për të gjithë ata që kanë kaluar rrugëtimin traumatik të tradhtisë,” tha aktorja australiane 69-vjeçare në një deklaratë për Daily Mail.
Deborra-Lee Furness dhe ylli i “Deadpool & Wolverine”, Hugh Jackman (56 vjeç), u martuan në vitin 1996 dhe njoftuan ndarjen e tyre në vitin 2023, pas 27 vitesh martesë. Furness e cilësoi ndarjen e tyre si “një plagë të thellë”.
“Megjithatë, unë besoj në një fuqi më të lartë dhe se Zoti/universi, kujtdo që i referoheni si udhërrëfyesi juaj, gjithmonë punon për ne. Ky besim më ka ndihmuar të përballoj fundin e një martese, që zgjati thuajse 3 dekada”, tha ajo.
“Edhe kur përballemi me vështirësi të dukshme, ato na çojnë te një e mirë më e madhe, te qëllimi ynë i vërtetë. Mund të na dhembë, por në të ardhmen, rikthimi te vetja dhe jetesa me integritet, vlera e kufij janë çlirim dhe liri,” shtoi Deborra-Lee.
Furness përfundoi deklaratën duke thënë se mbetet mirënjohëse.
“Ne të gjithë bëjmë udhëtimet tona individuale dhe besoj se marrëdhëniet në jetën tonë nuk janë rastësi. Na tërheqin njerëzit, i ftojmë brenda (zemrës), për të mësuar leksionet tona dhe për të njohur e shëruar pjesët e thyera brenda vetes… Unë mbetem mirënjohëse".
Në fillim të janarit, Jackman u fotografua në Kaliforni i kapur për dore me ish-kolegen e tij nga “The Music Man”, Sutton Foster. Foster, 50 vjeç, ka nisur procedurat për divorc në tetor të vitit 2024 nga bashkëshorti i saj, Ted Griffin, pas 10 vjet martese.
Furness dhe Jackman njoftuan ndarjen e tyre në shtator 2023, me një deklaratë ekskluzive për People:
“Jemi të bekuar që kemi kaluar gati 3 dekada së bashku si bashkëshortë në një martesë të mrekullueshme dhe plot dashuri. Udhëtimi ynë tani po ndryshon dhe kemi vendosur të ndahemi për të ndjekur rritjen tonë individuale.”
Ish-çifti ka dy fëmijë, djalin Oscar dhe vajzën Ava.
Artikuj të sugjeruar:
