Pas javësh në qendër të vëmendjes, për shkak të lakimit të emrit të saj në përplasjen ligjore mes Blake Lively dhe Justin Baldoni, duket se Taylor Swift më në fund “mund të marrë frymë lirshëm”.
Në një lëvizje të papritur, aktori dhe regjisori i filmit “It Ends With Us”, Justin Baldoni, ka tërhequr zyrtarisht kërkesën ligjore ndaj këngëtares dhe avokatit të saj, J. Douglas Baldridge, për të dëshmuar në gjyq.
Më herët, regjisori kërkoi që këngëtarja të jepte informacion mbi marrëdhënien e mikeshës së saj, Blake Lively, me bashkëthemeluesin e “Wayfarer Studios” gjatë xhirimeve të filmit.
Burime pranë çështjes deklaruan se tërheqja erdhi pasi informacioni i kërkuar u sigurua në një mënyrë tjetër, pa pasur nevojë për përfshirjen e këngëtares në procedura gjyqësore.
Blake Lively përfshiu në padi kompaninë që realizoi filmin, “Wayfarer Studios”, me pretendimin se ka dështuar ta mbrojë ose të marrë masa ndaj sjelljes së Baldoni-t ndaj saj. Këtë të fundit ajo e akuzon për ngacmim seksual.
Qëndrimi i Taylor Swift
Më herët, zëdhënësi i Taylor Swift dha një deklaratë pasi këngëtarja u thirr si dëshmitare në betejën ligjore midis Blake Lively dhe Justin Baldonit.
"Taylor Swift nuk ishte kurrë në sheshxhirimin e këtij filmi, nuk u përfshi në asnjë vendim për përzgjedhjen e aktorëve apo në vendime krijuese, nuk kompozoi muzikën e filmit, nuk pa asnjë premierë, nuk dha asnjë reagim dhe nuk e pa filmin "It Ends with Us" deri disa javë pas publikimit të tij. Ajo ka udhëtuar nëpër botë gjatë gjithë viteve 2023 dhe 2024 për turneun më të madh në histori", duke iu referuar turneut "ERA" të artistes.
Zëdhënësi shtoi se e gjitha kjo ishte një përpjekje për klikime dhe për të tërhequr vëmendjen e publikut.
"Lidhja e vetme e Taylor me këtë film ishte leja për të përdorur një këngë, "My Tears Ricochet". Duke pasur parasysh se përfshirja e saj ishte vetëm për licencimin e asaj kënge - siç kanë bërë 19 artistë të tjerë - kjo thirrje gjyqësore duket të jetë një përpjekje për të përdorur emrin e Taylor Swift për të tërhequr vëmendjen e publikut dhe klikime, në vend që të përqendrohet në faktet e çështjes."
Çështja ligjore mes dy kolegëve, Blake dhe Baldoni, mbetet tepër e tensionuar dhe pa shenja që sinjalizojnë një marrëveshje mes tyre.
Gjyqi në gjykatën federale është caktuar në datën 9 mars 2026.
Më shumë rreth gjyqit dhe përfshirjes së Taylor Swift:
