Protesta në Itali në mbështetje të Palestinës

Dhjetëra protestues u mblodhën të mërkurën përpara parlamentit italian në shenjë solidariteti me palestinezët në Gaza dhe për të kërkuar përfundimin e luftës mes Izraelit dhe Hamasit.

Ata valëvitën flamuj palestinezë dhe mbajtën pankarta ku kërkonin armëpushim.

Shumë protestues akuzuan Izraelin për gjenocid, për shkatërrimin e spitaleve dhe krijimin e një katastrofe humanitare në territorin e pushtuar.

“Po ndodh një krim kundër njerëzimit, një gjenocid i vërtetë. Prandaj mendoj se është e drejtë të ngremë zërin që kjo egërsi të ndalet,” u shpreh një prej protestueseve.

Dy punonjës të ambasadës izraelite në SHBA vriten pranë një muzeu hebre

Dy punonjës të ambasadës izraelite në Washington u qëlluan për vdekje të mërkurën në mbrëmje pranë një muzeu hebre, sipas Sekretares amerikane të Sigurisë Kombëtare, Kristi Noem.

Ngjarja u njoftua nga autoritetet zyrtarisht, pas të shtënave që u dëgjuan jashtë Muzeut Hebraik të Kryeqytetit, pranë zyrës qendrore të FBI-së në Washington.

Grupi hetimor po punon për të zbardhur rrethanat e plota të ngjarjes, teksa deri më tani të shtënat janë cilësuar si një akt kriminal i terrorizmit antisemit.

Omani konfirmon raundin e ri të bisedimeve SHBA-Iran për programin bërthamor

Ministri i Jashtëm i Omanit njoftoi se raundi i pestë i bisedimeve indirekte midis Shteteve të Bashkuara dhe Iranit për programin bërthamor të Teheranit do të mbahet të premten në Romë.

Deri më tani, as Teherani dhe as Washingtoni nuk kanë konfirmuar takimin dhe nuk kanë bërë të ditur nëse do të marrin pjesë.

Abbas Araghchi, zyrtar iranian për çështjet bërthamore, dha njoftimin në një postim në platformën X, duke theksuar se Irani nuk do të ndalojë asnjëherë pasurimin e uraniumit, një vijë e kuqe në negociatat me SHBA-në.

Komentet e Araghchit vijnë pas disa raundesh bisedimesh, përfshirë ato në nivel ekspertësh, për një marrëveshje të mundshme.

Papa Leo XIV bën thirrje për ndihmë humanitare në Gaza në audiencën e parë

Papa Leo XIV bëri thirrje për dërgimin e ndihmave humanitare në Gaza dhe “për marrjen fund të vuajtjeve të dhimbshme” të popullit palestinez, gjatë fjalës së tij të parë të përgjithshme në Sheshin e Shën Pjetrit.

"Përsëris thirrjen time të përzemërt për të lejuar hyrjen e ndihmave humanitare në Gaza dhe për t'i dhënë fund armiqësive, çmimin shkatërrues të të cilave po e paguajnë fëmijët, të moshuarit dhe të sëmurët", tha ai.

Sipas Vatikanit, rreth 40,000 njerëz morën pjesë në audiencë, disa ditë pas meshës së inaugurimit që mblodhi mbi 200,000 veta.