Jennifer Lawrence dhe Robert Pattinson, në një konferencë për shtyp në Festivalin e 78-të të Filmit në Kanë, kanë promovuar filmin e tyre “Die, My Love”, ku ndër të tjera, janë treguar shumë të hapur për përvojën e tyre si prindër të rinj.
Jennifer, 34 vjeç është nënë e dy fëmijëve. Ajo dhe bashkëshorti, Cooke Maroney mirëpritën Cy në vitin 2022. Më pas, në tetor 2024, u bë me dije se ajo ishte sërish në pritje të ëmbël.
"Të kesh fëmijë ndryshon gjithçka. Ndryshon gjithë jetën tënde. Është brutale dhe e pabesueshme”, u shpreh aktorja.
Pattinson, i cili është babai i një vajze 1-vjeçare me Suki Waterhouse, shtoi:
"Mendoj se në mënyrat më të papritura, të kesh një fëmijë të jep një burim të madh energjie dhe frymëzimi. Është një lloj tjetër energjie”.
Më tej, Jennifer Lawrence tregoi se të qenit një nënë ndikon në punën e saj. Ajo u shpreh se fëmijët e vendosin se ku, kur dhe madje, edhe nëse do të punojë.
“Janë pjesë e çdo vendimi. Dua të them, nuk e dija që mund të ndjeja kaq shumë. Puna ime lidhet shumë me emocionet dhe fëmijët më kanë hapur botën. Ata ma kanë ndryshuar jetën, padyshim për mirë, dhe më kanë ndryshuar krijimtarinë. E rekomandoj shumë të kesh fëmijë, nëse dëshiron të jesh aktor”, tha fituesja e çmimit Oscar.
Pattinson, nga ana e tij, tha me shaka se “është e pamundur që një burrë të përgjigjet siç duhet për këtë temë.”
"Është fjalë për fjalë siç tha Jennifer. Unë jam këtu vetëm për mbështetje," vazhdoi ai.
“Që kur ajo [vajza] lindi, më ka rigjallëruar mënyrën si e shikoj punën dhe po, jam një person krejtësisht tjetër”.
Filmi “Die, My Love" debutoi në festivalin e përvitshëm në Kanë. Projekti kinematografik sjell një përshtatje e romanit të vitit 2017 nga Ariana Harwicz dhe flet për një nënë të re që përjeton depresion pas lindjes dhe kalon në psikozë. Regjisorja dhe skenaristja është Lynne Ramsay (e njohur për “We Need to Talk About Kevin”) dhe filmi është në garë për të marrë çmimin “Palme d'Or”.
Kasti dhe ekipi i filmit morën një ovacion prej nëntë minutash pas premierës në Festivalin e Filmit në Francë.
Artikuj të sugjeruar:
