Ky është një artikull për të gjithë, por veçanërisht për emigrantët shqiptarë që jetojnë jashtë vendit dhe mund të votojnë nr. 26, për këngën “Zjerm” të Shkodrës Elektronike në Eurovision. Nëse dilemat të kanë pushtuar dhe ende nuk e di nëse duhet të gjesh kodin dhe të votosh sipas shtetit, na lejo të të themi disa arsye që ndoshta do të ta mbushin mendjen.

Është kënga që na përfaqëson!

Afërmendsh, arsyeja kryesore! “Zjerm” i ka rrënjët në historinë tonë, por ndërthuret bukur dhe krijon harmoni me modernitetin. Dialekt, melodi që të fiksohet, shumë autenticitet, një Kolë stoik dhe një Beatriçe që ka krijuar një kërcim unik – të gjithë elementet krijojnë kombinimin perfekt për të të rrëmbyer një votë.

Një përfaqësim goxha i denjë
 
Nuk e themi ne, por një pjesë e madhe e botës! Jo vetëm që merituan finalen, por Shkodra Elektronike meriton edhe fitoren! Do të ishte hera e parë për Shqipërinë, e cila gjithnjë vlerësohet, por diçka ndodh dhe ne rallëherë e prekim top 10. Këtë herë, vota juaj mund të bëjë vërtet diferencën dhe mund të mos fajësojmë politikën e diplomacinë.
 
Ndër të tjera, “Zjerm” është renditur në pozicione shumë të mira në sondazhe të shumta, si dhe sipas CNN duhet të fitojë Eurovision 2025.

Një ëndërr e bërë realitet

“Ndonjëherë, më duket sikur kjo që po bëj është më e madhe se unë”, u shpreh me sinqeritet dhe modesti Beatriçe Gjergji në një intervistë me RTSH dhe në fakt, e dimë që është ëndrra e çdo artisti që të përfaqësojë shtetin e vet në një skenë kaq të madhe sa Eurovision-i. Beatriçja dhe Kola po e bëjnë detyrën e vet, po na krenojnë, ndaj është detyra jonë t’i mbështesim dhe të bëjmë realitet ëndrrën e tyre, por edhe pse jo, të marrim kupën e parë nga gara e muzikës.
 
Një këngë që krijohet e këndohet me shpirt
 
Beatriçja dhe i ati i saj, Mario, e kanë theksuar se “Zjerm” mbart fjalët e shpirtit të këngëtares dhe kjo projektohet duke na dhënë emocione jo vetëm ne shqiptarëve, por edhe atyre që as nuk e kuptojnë se për çfarë flet kënga. Një këngë e tillë, autentike, e cila ka rrëmbyer zemrat e njerëzve, duhet të jetë patjetër fituese, ose të paktën, të renditet në top 5. :)

 
Votojmë për gjithçka; le të votojmë edhe për artin!
 
Votat tona kanë shkuar për shumë gjëra. Më e freskëta? Për “BBVA 4”. Kemi votuar në dhjetëra televotime të befta dhe të mirëmenduara dhe as nuk i kemi llogaritur ato lekë, ndërsa tani është momenti të votojmë për artin dhe për t’u treguar Beas dhe Kolës se ne jemi mbështetja e tyre më e madhe. Le të mos i braktisim artistët; le t’u tregojmë se jemi krenarë për ta!
 
Shkruajmë historinë
 
Ne shqiptarët mund të jemi të parët për shumë gjëra, por nëse triumfon Shkodra Elektronike, do të jetë e para herë që fitojmë Eurovision-in. Ndaj, një mesazh larg jeni. Mos mendoni se nuk bëni ndryshimin, është krejt e kundërta. Hajdeni, zjerm Shkodra Elektronike në Eurovision, zjerm votat tona!