E njihni atë ndjesinë kur je me perioda, ke dhimbje të tmerrshme barku, të dhemb shpina dhe thjesht nuk ekziston asnjë pikë fuqie që të të bëjë të ngrihesh nga krevati, por duhet, sepse ke punë? Bella Hadid e njeh mirë këtë ndjesi dhe mendon se ka ardhur koha që kjo torturë të marrë fund. Sipas saj, duhet të jetë e ndaluar me ligj që gratë të detyrohen të punojnë gjatë ciklit menstrual.

Në një intervistë të fundit për British Vogue, supermodelja ndau idenë e saj për leje mjekësore gjatë ciklit menstrual. Duke folur për mënyrën si modelingu ndikoi në marrëdhënien e saj me trupin që në moshën 18-vjeçare, Bella tha:

“Sapo isha larguar nga shtëpia e prindërve dhe hyra direkt në një botë ku duhet të shikosh veten në pasqyrë çdo ditë. Dhe ndërkohë, kemi perioda. Bën set fotografik për Victoria’s Secret kur je me cikël, duke vuajtur nga endometrioza. Kjo duhet të jetë e jashtëligjshme.”

Dhe nuk u ndal me kaq. Bella shtoi me ironi:

“Do t’i flas Shtëpisë së Bardhë për këtë – duhet të ndalohet ligjërisht puna për gratë gjatë javës së ciklit. Madje edhe javën para.”

Bella, e cila ka folur hapur për problemet e saj shëndetësore si endometrioza, ADHD, depresioni, ankthi, PMDD, PCOS dhe sëmundja Lyme, është një individ që përballet me dhimbjen kronike.

“Mendoj se askush nuk e kupton realisht se çfarë do të thotë të jetosh me sëmundje kronike,” tha ajo për British Vogue. “Ka ditë kur është e vështirë edhe të bësh një dush.” Dhe shton se në ditët e rralla të pushimit, “Nëse arrij të bëj një dush dhe të përgatis mëngjesin, e konsideroj sukses.”

Për të përballuar presionin e vazhdueshëm të punës çdo ditë, Bella ka krijuar një alterego të quajtur Belinda.

“Belinda thjesht bën punën e saj. Mund të jetë duke qarë nga ora 5 deri në 7 të mëngjesit, por sapo arrin në punë, buzëqesh dhe e përballon ditën. Kjo është Belinda për mua,” shpjegon ajo.

Artikuj të rekomanduar: