Këngëtarja Casandra Ventura, a.k.a Cassie, ish-e dashura e Sean Diddy Combs është një prej dëshmitareve kyçe të çështjes së shumëpërfolur ku ikona e industrisë është akuzuar nga disa burra e gra për përdhunime, prostitucion dhe shantazhe. Cassie ka dëshmuar mes lotësh një ndër fragmentet e përdhunimit që i është bërë nga Diddy, duke dhënë detaje tronditëse.
Ajo foli e përlotur në ditën e dytë të dëshmisë së saj gjatë së mërkurës, ku u shpreh se dhuna psikologjike e fizike që ka përjetuar nga Diddy ka zgjatur për rreth 11 vjet. Ajo tha para gjykatësve se i kishte dhënë fund lidhjes me Diddy-n, kur një darkë ata ishin takuar për një “bisedë të fundit” për të mbyllur kapitullin e marrëdhënies. Gjatë darkës, ajo tha se Diddy ishte “xhentil” dhe "i sjellshëm", por më pas, kur e çoi në apartamentin e saj, ai e përdhunoi.
“Ai më përdhunoi në dhomën time të ndenjes. Mbaj mend që po qaja, i thosha "jo", por gjithçka ndodhi shumë shpejt”, u shpreh ajo.
Çështja e përdhunimit u përmend për herë të parë në vitin 2023, kur Ventura e paditi Combs në një proces civil, në të cilin e akuzoi për abuzim fizik dhe seksual. Diddy i ka mohuar akuzat. Më tej, ata arritën në një marrëveshjen brenda ditës. Ventura zbuloi gjatë dëshmisë se kishte marrë 20 milionë dollarë “dëmshpërblim” nga Combs dhe kompanitë e tij.
Padia e Cassie-t solli edhe një lumë të tjera padish, në të cilat shumë vajza, madje edhe burra, akuzuan Combs për përdhunim apo abuzim. Padia e artistes dhe e personave të tjerë çoi në arrestimin e Diddy-t në shtator të vitit të kaluar, pas një hetimi federal, nga i cili u bë edhe kontrolli i banesave të tij. Në banesa u gjetën ndër të tjera edhe 1,000 shishe vaji bebi, që supozohej se përdorej si lubrifikant ose edhe për të penguar largimin e vajzave nga “festat e bardha” që Diddy organizonte. Vajzat, supozohej që drogoheshin dhe kur tentonin të iknin, rrëshkisnin nga vaji i bebit.
Combs përballet me akuza për përdhunim, shantazh, trafikim seksual dhe transport për qëllime prostitucioni. Ai ka deklaruar se është i pafajshëm dhe i mohon të gjitha akuzat. Nëse shpallet fajtor, ikona e industrisë muzikore mund të dënohet me burgim të përjetshëm.
Padia e Ventura-s vjen pas dekadash heshtjeje dhe ajo e ceku gjatë gjyqit këtë tematikë. E pyetur se pse e denoncoi rastin dhe zgjodhi të dëshmonte kundër Combs. Ventura u shpreh:
“Nuk mund të mbaj më turpin, fajin, mënyrën se si u udhëzova të trajtoja njerëzit, si të ishin të pavlerë. E drejta është e drejtë, e gabuara është e gabuar. Jam këtu për të bërë gjënë e duhur.”
Në dëshmi të tjera, Cassie tha se Combs e kishte shantazhuar duke kërcënuar se do të publikonte video eksplicite të saj nga të ashtuquajturat “freak-offs”, takime seksuale të mbushura me drogë dhe zhigolo, për të cilat këngëtarja tha se Combs i organizonte dhe i drejtonte.
Në gjyq u treguan edhe foto të reja, të cilat shfaqnin mavijosje në fytyrën dhe trupin e Cassie-t. Gjithashtu, u panë edhe materiale eksplicite nga “festat e çmendura”.
Cassie tha se kishte parë gjithashtu Combs të ishte i dhunshëm ndaj punonjësve të tij dhe miqve të saj, duke kujtuar një rast kur ai kishte kërcënuar se do të hidhte një nga miqtë e saj nga ballkoni.
Artikuj të sugjeruar:
