Këngëtari i njohur i hitit “All of Me”, John Legend ka folur së fundmi për Kanye West në një intervistë për “The Sunday Times”, duke u ndalur tek marrëdhënia e dikurshme mes tyre dhe transformimi i reperit, veçanërisht pas deklaratave të fundit që kanë shkaktuar reagime të forta në publik.

“Dikur, Kanye ishte shumë pasionant, jashtëzakonisht i talentuar dhe kishte ëndrra të mëdha – jo vetëm për veten, por edhe për të gjithë ata që kishte rreth vetes,” tha Legend, duke kujtuar kohën kur West luajti një rol të rëndësishëm në ngritjen e karrierës së tij, sidomos gjatë bashkëpunimit në albumin e vitit 2004, “The College Dropout.”

“Ai kishte një optimizëm dhe kreativitet të jashtëzakonshëm,” shtoi Legend. “Është e trishtueshme, ndonjëherë edhe tronditëse, të shohësh se si është transformuar tani.”, shtoi ai.

Fituesi i çmimit EGOT pranoi se nuk kishte parë asnjë shenjë të “fiksimeve” aktuale të West, duke përfshirë “antisemitizmin dhe urrejtjen ndaj vetë komunitetit të tij”.

 “Është vërtet e dhimbshme të shohësh degradimin e tij.”

Kur u pyet pse mendon se West ka ndryshuar kaq shumë, Legend u përgjigj:

“Nuk mendoj se jemi të kualifikuar ta analizojmë psikologjikisht atë.”

Megjithatë, ai shtoi: “Pas ndarjes nga jeta e nënës së tij, në vitin 2007, pësoi padyshim një ndryshim. Kjo gjendje e tij filloi që atëherë dhe duket se është përshpejtuar në vitet e fundit.”

Nëna e West, Donda West, vdiq nga një atak kardiak në moshën 58-vjeçare, një ditë pasi iu nënshtrua disa ndërhyrjeve kirurgjikale estetike, përfshirë liposuksion, heqje barku dhe reduktim të gjoksit.

Në nder të saj, West publikoi albumin “Donda” në vitin 2021 dhe “Donda 2” në vitin 2022. Ai gjithashtu e quajti shkollën e tij private të krishterë në Kaliforni, Donda Academy, në kujtim të saj.

Artikuj të sugjeruar: