Miley Cyrus zgjodhi që më në fund të reagojë publikisht, pas thashethemeve të shumta që gëlojnë mbi marrëdhënien e saj me prindërit. Këngëtarja, 31 vjeç, publikoi një deklaratë publike në Instagram të shtunën, më 10 maj, duke adresuar pretendime të pavërteta për nënën e saj, Tish Cyrus, ndërsa dha edhe një përditësim për marrëdhënien e saj me babain, Billy Ray Cyrus.

“Rrallëherë komentoj mbi thashethemet, por unë dhe nëna ime jemi shumë të lidhura për të lejuar që diçka të na ndajë,” filloi Miley deklaratën e saj. “Ajo është shoqja ime më e mirë. Si shumë nëna, ajo nuk di të përdorë mirë telefonin dhe në një mënyrë a tjetër, më hoqi nga Instagram-i — (kaq) e thjeshtë, e rastësishme dhe e parëndësishme”, u shpreh ajo, referuar faktit që e ëma e kishte hequr nga Instagram-i.

Edhe pse Tish, 57 vjeç, u shpreh se “nuk e kishte idenë se si kishte ndodhur” dhe se problemi ishte “rregulluar”, sërish thashethemet nuk u ndalën. Në të njëjtën ditë kur ndodhi incidenti, i ati i Miley-t, Billy Ray, 63 vjeç, publikoi një video të vjetër të këngëtares dhe më tej, një selfie. Duke qenë se marrëdhënia e saj me të atin ka ngjallur gjithnjë zëra dhe spekulime, Miley foli edhe për të, duke pranuar se “kanë pasur sfidat e tyre ndër vite”.

“Unë dhe im atë kemi pasur sfidat tona ndër vite. Tani që jam në të tridhjetat, familja është prioriteti im. Jam në paqe me faktin që urat janë ndërtuar dhe koha ka shëruar shumë gjëra. Jam mirënjohëse për shëndetin dhe dashurinë që rrjedh në familjen time.”

Miley ka folur edhe më parë mbi këtë marrëdhënie në një intervistë me David Letterman. Ajo u shpreh për “My Next Guest Needs No Introduction” për ndikimin që i ati kishte në karrierën e saj, si dhe u shpreh se prej tij ka trashëguar “narcizmin”.