Mëngjesi nis butësisht në Green Coast, me rrezet e diellit që ndriçojnë mbi det dhe një aromë të lehtë kripe në ajër. Kafja dhe mëngjesi shijohen në tarracën e vilës, apartamentit, apo në baret dhe restorantet buzë detit, duke parë dallgët që përplasen në breg. Në këtë moment qetësie, një libër i hapur, një mendim i shkruar në letër apo meditimi duke vështruar horizontin, është fillimi i një dite ndryshe nga e zakonshmja.
Kur dielli ngrihet më lart, nis edhe aventura. Green Coast shtrihet në një zonë të mbushur me shtigje hiking për t’u eksploruar, që nisin në bregdet dhe ngjiten përgjatë Parkut Kombëtar të Llogarasë. Një prej tyre është edhe Shtegu i Cezarit, rruga nëpër të cilën ka kaluar Jul Cezari me legjionin e tij pasi ankoroi anijen në Green Coast, duke i dhënë këtij bregu një histori që vazhdon të jetojë mes gurëve dhe dallgëve.
Gjatë eksplorimit të historisë së pasur të kësaj zone, nuk mund të mungojë as kisha e vjetër e Shën Nikollës me ikonat e lashta dhe nëse dëshira për aventurë është ende e fortë, dita vazhdon në Parkun Kombëtar të Llogarasë. Si një nga pasuritë natyrore më të çmuara të Shqipërisë dhe pjesë e vendeve të UNESCO-s, ky park përbëhet nga pyje të dendura, shtigje panoramike, pamje mbresëlënëse të Rivierës Shqiptare nga lart dhe të gjitha shijet e kuzhinës tradionale.
Pas një dreke të shijshme, pasditja të rikthen në Green Coast, ku dielli fillon të ulet ngadalë dhe e mbështjell natyrën e egër me ngjyrat e ngrohta të perëndimit. Kjo është “ora e artë” që mezi e presin të gjithë të apasionuarit e fotografisë. Me peizazhet shumëngjyrëshe që krijon bashkimi i detit dhe malit, bukuritë natyrore nuk zbehen, por tjetërsohen në çdo stinë, për të përcjellë gjendje të ndryshme që të prekin njëlloj.
Kur vjen mbrëmja, dita mbyllet aty ku filloi, buzë detit. Përreth zjarrit të ndezur, me një gotë verë në dorë, bisedat mes miqve zgjasin deri vonë, me zhurmën e detit në sfond. Ndryshe nga muajt e nxehtë të verës, Green Coast tani rrezaton një tjetër energji, pasi koha ecën më ngadalë dhe çdo moment shijohet ndryshe. Larg zhurmës dhe përditshmërisë, ky është një vend që të fton të zhytesh në natyrë, histori dhe përvoja unike.
