Qeveria suedeze planifikon të konsiderojë si akt kriminal testet e virgjërisë, të cilat përfshijnë një mjek që konfirmon se një grua nuk ka pasur marrëdhënie seksuale, për të mbrojtur gratë dhe vajzat nga krimet që vijnë si pasojë e mendësisë për “ruajtjen apo vënien e nderit në vend”.

Vrasje të tilla shpesh kryhen nga anëtarët e familjes me qëllim respektimin e traditës ose kërkesave të veçanta fetare, kulturore ose zakonore të një komuniteti, sipas Këshillit të Europës.

“Testi i virgjërisë është një metodë, pa bazë shkencore, që pretendon të përcaktojë nëse një grua ka pasur marrëdhënie seksuale duke shqyrtuar nëse himeni është i paprekur.”

Ekspertët argumentojnë se këto teste janë të pabaza dhe përbëjnë shkelje të integritetit seksual. Në vitin 2018, Organizata Botërore e Shëndetësisë bëri thirrje për heqjen e këtij lloj ekzaminimi.

Suedia synon të konsiderojë akt kriminal si lëshimin e certifikatave ashtu edhe kryerjen e procedurave përkatëse, duke lejuar ndjekjen penale të shkelësve, sipas Shërbimit Social Suedez. Deri më tani, vetëm profesionistët e shëndetësisë që kryejnë këto "ekzaminime" përballen me masa disiplinore.

Një raport qeveritar thotë se këto praktika rrallë raportohen në Suedi, megjithëse disa gra i nënshtrohen testeve ose operacioneve të tilla jashtë vendit, të cilat shpesh lidhen me një kulturë dhune të lidhur me gjininë dhe moralin.

UN Women (agjencia e OKB-së për gratë) përfshin testet e virgjërisë midis praktikave të dëmshme që shkelin të drejtat e njeriut dhe vënë shëndetin seksual dhe riprodhues dhe të drejtat e vajzave dhe grave të reja "në rrezik të madh".  Siç shprehet shërbimi në njoftimin e tij:

“Theksimi i virgjërisë së një gruaje është një formë e diskriminimit gjinor. Termi “virgjëri” nuk është mjekësor apo shkencor. Përkundrazi, është një konstrukt shoqëror, kulturor dhe fetar – një konstrukt që pasqyron diskriminimin gjinor ndaj grave dhe vajzave.

Pritja shoqërore që vajzat dhe gratë duhet të mbeten “virgjëresha” (domethënë, pa pasur marrëdhënie seksuale) bazohet në perceptime stereotipike se seksualiteti femëror duhet të kufizohet brenda martesës.

Ky perceptim është i dëmshëm për gratë dhe vajzat në nivel global.”

Në Belgjikë, testet e virgjërisë nuk janë të ndaluara - megjithatë, në vitin 2019, Urdhri i Mjekëve u bëri thirrje mjekëve të ndalonin pjesëmarrjen në praktika të tilla. Spitalet, për shembull, në Antverp dhe Bruksel pranojnë herë pas here kërkesa për certifikata virgjërie.

Megjithatë, që nga viti 2021, në Francë është e paligjshme që punonjësit e kujdesit shëndetësor të lëshojnë certifikata virgjërie, me mjekët që përballen me deri në një vit burg dhe një gjobë prej 15,000 eurosh. Në Mbretërinë e Bashkuar, kjo praktikë dënohet me deri në pesë vjet burg që nga viti 2022.

Burimi: Marie Claire