Protestat për emigrantët: Trump dërgon Gardën Kombëtare në Kaliforni
Presidenti Donald Trump ka urdhëruar vendosjen e 2,000 trupave të Gardës Kombëtare të Kalifornisë në Los Angeles, pavarësisht kundërshtimeve të guvernatorit Gavin Newsom, pas përplasjeve të përsëritura mes protestuesve dhe forcave federale të emigracionit.
Newsom reagoi në rrjetet sociale, duke e quajtur vendimin si një veprim “të qëllimshëm dhe frikacak” që “do të përshkallëzojë tensionet” dhe akuzoi qeverinë federale për krijimin e një situate kaotike.
Deri më tani janë arresuar të paktën 27 protestues, teksa përshkallëzimi i protestave vazhdon.
Ukraina zmbraps një sulm rekord nga Rusia: 499 raketa dhe dronë
Në një sulm të përmasave të pazakonta, Rusia lëshoi të hënën 499 mjete fluturuese, përfshirë dronë kamikazë dhe raketa balistike, drejt Ukrainës.
Forcat e mbrojtjes ajrore të Ukrainës deklaruan se kanë neutralizuar 479 prej tyre: 292 u rrëzuan dhe 187 u kapën nga radarët.
Ky sulm përfshiu edhe raketa të sofistikuara si “Kinzhal” dhe lloje të ndryshme të raketave kundërradar.
Izraeli thotë se aktivistët do të kthehen në vendin e tyre
Izraeli ka ndaluar një anije që po transportonte ndihma drejt Gazës dhe ka konfirmuar se grupi i aktivistëve në bord, mes tyre Greta Thunberg, do të kthehet në vendet e tyre të origjinës.
Autoritetet izraelite njoftuan se ndihmat do të dërgohen në Gaza nëpërmjet kanaleve zyrtare.
Ministria e Jashtme izraelite e quajti misionin “jahti i selfie-ve të të famshmëve” dhe e cilësoi si një akt propagandistik.
Lavrov kritikon Perëndimin për Kosovën, e lidh me ndërhyrjen në Ukrainë
Ministri i Jashtëm i Rusisë, Sergei Lavrov, kritikoi ashpër vendet perëndimore për rolin e tyre në pavarësinë e Kosovës, duke thënë se parimi i vetëvendosjes u përdor në mënyrë të padrejtë.
Gjatë një fjalimi në Moskë, ai deklaroi se Kosova shpalli pavarësinë pa referendum, ndryshe nga rasti i Krimesë, duke e përdorur si argument për të justifikuar ndërhyrjen ruse në Ukrainë.
Ai akuzoi gjithashtu Britaninë e Madhe dhe vende të tjera për mbështetje ndaj, siç i quajti, “sulmeve terroriste” në Donbas dhe përpjekjeve për zhdukjen e gjuhës ruse.
