Drama pas “Big Brother VIP Kosova 3” duket se nuk ka përfunduar për ish-banorët Sara Kolami dhe Drilon Rama.

Për ju që nuk jeni përditësuar: Gjatë qëndrimit në shtëpi, mes tyre pati një kimi që u komentua gjerësisht, ndonëse nuk u konfirmua kurrë një lidhje zyrtare. Fansat e tyre dëshironin t’i shihnin si çift edhe jashtë shtëpisë. Pas mbarimit të programit, marrëdhënia mbeti e paqartë për publikun. Driloni ishte i ftuar në ditëlindjen e Sarës, pozoi me të dhe i dedikoi një urim publik me fjalët: “Gëzuar ditëlindjen o zog high class.” Kjo gjë shtoi dyshimet për një lidhje të mundshme.

Megjithatë, situata mori kthesë së fundmi kur një video e Drilonit duke u puthur me një vajzë tjetër filloi të qarkullonte në rrjet. Më vonë, Sara Kolami e hoqi nga Instagrami, një veprim që u interpretua si një distancim i qëllimshëm.

Në përgjigje të kësaj, Driloni publikoi një deklaratë në rrjete sociale, ku mohon çdo lidhje romantike me Sarën dhe hedh akuza të forta.

“Unë me atë personin që po mundoheni të më lidhni – nuk kemi qenë bashkë. Kemi pasur respekt, jemi kuptuar mirë – edhe brenda, edhe jashtë – por kurrë nuk ka pasur asgjë më shumë, as do të ketë,” shkruan ai.

Më pas shton:

“Nuk kemi pasur kontakt për më shumë se dy muaj, as nuk kemi shkruar asgjë. Këtë postim desha ta bëja prej kohësh, por nuk kam dashur të nxjerr askënd keq. Por ndonjëherë duhet të veprosh i pari dhe të kujdesesh për veten. Ajo video që po qarkullon është nga disa vite më parë. Ajo e ka përdorur për interesat e saj, ka vepruar siç i ka interesuar – nuk ka lidhje me mua. Unë kurrë nuk jam marrë me famë, me shfaqje, s’kam bërë zhurmë për qejfin e njerëzve. Kjo nuk është bota ime, kurrë s’ka qenë.”

Në deklaratën e tij, Driloni bën përgjegjëse Sarën për keqkuptimet e krijuara:

“Si ka vendosur ta paraqesë ajo, është puna e saj. Por nuk ka pasur guxim të tregojë drejt, prandaj po e them unë tani: mes meje dhe saj kurrë nuk ka pasur asgjë – dhe nuk do të ketë. Pikë.”

Duke reaguar ndaj komenteve për të qenë çift me Sarën, Driloni nuk i kurseu fjalët për ndjekësit që kanë krijuar pritshmëri të rreme:

“Ju keni një film në kokë, e doni me çdo kush ta bëni realitet. E kur e shihni që nuk është ashtu, filloni me shpifje, shkruani budallallëqe nga të gjitha anët.”

Pra, dashuria mund të mos ketë lulëzuar në BBVK-3, por drama padyshim që ka. Tani, të gjithë presin Sarën.