India dhe Pakistani janë në prag të një konflikti më të gjerë

India goditi Pakistanin dhe Kashmirin pakistanez me raketa të mërkurën dhe Pakistani u zotua të hakmerret duke thënë se rrëzoi pesë avionë indianë, në përplasjen më të keqe në më shumë se dy dekada midis fqinjëve të armatosur me armë bërthamore.

India tha se “nëse Pakistani përgjigjet, India do të përgjigjet", duke nxitur frikën e një konflikti më të madh ushtarak në një nga rajonet më të rrezikshme - dhe më të populluara - të armëve bërthamore në botë.

India deklaroi se goditi nëntë vende "infrastrukture terroriste", disa prej të cilave të lidhura me një sulm nga militantët islamikë që vrau 25 turistë hindu dhe një vendas në Kashmirin indian muajin e kaluar.

Pakistani njoftoi se të paktën 31 civilë ishin vrarë dhe 46 të plagosur, tha një zëdhënës ushtarak, dhe se India "kishte ndezur një zjarr të madh në rajon".

Konlava në Vatikan: Del tymi i zi

Tym i zi doli nga oxhaku në majë të Kapelës Sistine, duke sinjalizuar se 133 kardinalët e mbyllur brenda nuk arritën të zgjedhin një papë të ri në ditën e parë të konklavës.

Procesi i votimit filloi dje rreth orës 17:45. Pas një pritjeje të tensionuar, tymi i zi u shfaq në orën 21:05  dhe u shoqërua me duartrokitje nga turma.

Konklava do të vazhdojë të enjten dhe do të përfundojë vetëm kur të zgjidhet një papë i ri.

Sulmi rus shkaktoi dëme me vlerë dhjetëra milionë dollarë në Çernobil

Një dron rus vlerësohet se ka shkaktuar dëme me vlerë dhjetëra milionë dollarë në vendin e centralit bërthamor të Çernobilit, sipas vlerësimeve fillestare dhe ekspertëve të inxhinierisë.

Kostoja e riparimit të plotë ka të ngjarë të mbulohet nga qeveritë perëndimore, përfshirë Mbretërinë e Bashkuar.

Goditja ndodhi në mesin e shkurtit dhe nuk shkaktoi rrezik të menjëhershëm radiologjik, por dëmtoi ndjeshëm strukturën prej 1.5 miliardë eurosh të ndërtuar në vitin 2017 për të mbështjellë reaktorin dhe ka të ngjarë të duhen muaj, madje edhe vite, për ta riparuar plotësisht.

Parlamenti Europian: Pranimi i Turqisë mbetet pezull, pa përparim që nga viti 2018

Procesi i pranimit të Turqisë në BE mbetet i ngrirë për shkak të prapambetjes demokratike, pavarësisht rëndësisë strategjike të Turqisë dhe bashkëpunimit për migracionin, thanë eurodeputetët në raportin e tyre të fundit.

Procesi i pranimit të Turqisë në BE, i cili ka qenë në ngërç që nga viti 2018, nuk mund të riniset në rrethanat aktuale, pavarësisht rëndësisë gjeopolitike dhe strategjike të Ankarasë, thotë një raport i Parlamentit Europian.

Eurodeputetët në Strasburg miratuan raportin të mërkurën, me 367 vota pro, 74 kundër dhe 188 abstenime.