Pas më shumë se dy dekadash që njerëzit flisnin në Skype, Microsoft ka njoftuar fundin e një epoke, që do të thotë: Mbylljen e Skype, një prej aplikacioneve pioner në komunikimin përmes internetit.

Skype u lançua në vitin 2003 dhe transformoi mënyrën se si njerëzit dhe kompanitë komunikonin, duke ofruar thirrje zanore dhe me video, shumë kohë përpara se Zoom, FaceTime dhe WhatsApp të përdoreshin.

Tanimë, Microsoft po e zhvendos vëmendjen drejt platformave më të sofistikuara dhe moderne si Microsoft Teams. Në një deklaratë zyrtare, Microsoft tha se shërbimet e Skype do të ndërpriten. Përdoruesit ekzistues do të marrin udhëzime se si të transferojnë kontaktet dhe historikun e bisedave në shërbime të tjera të Microsoft, veçanërisht në Teams.

“Ndonëse Skype luajti një rol themelor në formësimin e komunikimit digjital, tashmë jemi të përqendruar në ofrimin e një përvoje të integruar dhe të plotë përmes Microsoft Teams,” tha Jeff Teper, president i “Microsoft 365 Collab Apps & Platforms”, duke shtuar: “Ky kalim pasqyron mënyrën se si njerëzit dhe organizatat komunikojnë sot — me bashkëpunimin, integrimin dhe fleksibilitetin në thelb”.

“Ndërsa hedhim këtë hap të radhës me Teams, jemi entuziastë për mundësitë që na presin. Mezi presim të vazhdojmë të mbështesim lidhjet e përditshme të njerëzve, duke filluar me lehtësimin e hyrjes në Teams, përmes llogarive të tyre në Skype,” përfundon Teper.

S'i themi dot "lamtumirë" pa menduar se sa shpejt kalojnë vitet...