Veshja që Shkodra Elektronike do të performojë në Eurovision 2025 është një ndërthurje e modës bashkëkohore dhe simbolikës së fortë nga legjendat shqiptare, konkretisht ajo e Rozafës. Veshja, e krijuar nga Irina Dema (e ëma e Beatriçe Gjergjit), ka disa elemente të veçantë.

Një nga detajet më intereante është pjesa e djathtë e fustanit e konceptuar për të ngjasuar me anatominë e trupit të njeriut, duke përfshirë venat e gjakut. Ky dizajn lidhet me kërkesën e Rozafës, e cila sipas legjendës, kërkoi para se ta murosnin që syrin, dorën, gjirin dhe këmbën e djathtë t’ia linin jashtë në mënyrë që të shihte, të përkëdhelte, të ushqente me qumësht gjiri dhe të përkundte në djep të birin.

Pjesa e majtë e fustanit krijon kontrast me pjesën e djathtë. Fustani ka një strukturë asimetrike dhe është bërë nga materiale që ndriçojnë, duke krijuar një efekt vizual të fuqishëm. Kjo e bën veshjen tërheqëse për një skenë ndërkombëtare si Eurovision.

Ndërkohë Kolë Laca vjen i veshur me një kostum të zi që duket se përfaqëson fortesën e Shkodrës. Tonet e ngjyrave përkojnë edhe me tematikën e këngës, "Zjerm".

Kolë Laca dhe Beatriçe Gjergji janë dy emigrantë shqiptarë që janë rritur në Itali, larg qytetit të tyre mëmë, Shkodrës. Ky detaj shton edhe një nuancë personale dhe autentike për performancën.

Veshja e tyre është një shembull i mënyrës se si arti mund të bashkojë trashëgiminë kulturore dhe modën, duke e transformuar një legjendë të njohur shqiptare në një moment të fuqishëm vizual dhe emocional.

Eurovision Song Contest 2025 do të zhillohet në Basel, Zvicër, pas fitores së Nemo me këngën "The Code” vitin e kaluar. Konkursi do të mbahet më 13 – 17 maj.