Victoria Beckham u shfaq për herë të fundit si pjesë e “Spice Girls”, në skenën e ceremonisë së mbylljes së Lojërave Olimpike të Londrës, në vitin 2012. Që nga ajo kohë dëshira më e madhe e të gjithëve ka qenë të shohin sërish grupin të performojë së bashku.
Nga ana tjetër, duket se edhe vetë vajzat e grupit muzikor duan që të ribashkohen dhe madje kanë bërë shpesh herë përpjekje për t’u shfaqur sërish në skenë.
Fatkeqësisht, ndërsa grupi punon shumë për të organizuar një tjetër turne ribashkimi, ende mungon një emër në program: Victoria Beckham, ajo që konsiderohet më e famshmja nga të gjitha.
Por cila është arsyeja që ajo u la jashtë projektit aktual të grupit, i cili shpreson të korr sukses me një seri koncertesh anembanë botës vitin e ardhshëm?
“Arsyeja mund të përmblidhet në dy fjalë të thjeshta: Simon Fuller", raporton Daily Mail.
Pas dekadash tensioni dhe armiqësie, katër anëtaret e tjera të “Spice Girls” – Mel B, Mel C, Geri Horner dhe Emma Bunton – po punojnë përsëri me ish-menaxherin e tyre, Simon Fuller, tani 64 vjeç. I gjithë ky organizim po bëhet me shpresën se katërshja do të jetë në gjendje të nisë një turne potencialisht fitimprurës që shënon 30-vjetorin e këngës së tyre debutuese të vitit 1996, “Wannabe”, vitin e ardhshëm.
Megjithatë, ndërsa pjesa tjetër ia ka dalë t’i lërë pas mosmarrëveshjet, Victoria dhe bashkëshorti i saj, David Beckham, mbajnë ende mëri me menaxherin e grupit muzikor.
Në fakt, marrëdhëniet midis tyre u përkeqësuan aq shumë sa dyshja ndërprenë kontratat me “Simon's XIX Entertainment” në vitin 2018.
"Bashkëpunimi i Spice Girls me Fuller do të thotë se nuk ka absolutisht asnjë shans që Victoria të jetë e përfshirë", tha një burim pranë grupit.
Prishja e partneritetit Beckham-Fuller
Në vitin 2018 ishte e qartë (dhe ndodhi) se David Beckham dhe menaxheri Fuller do të ndaheshin, pas 15 vitesh bashkëpunimi, vazhdon raporti. David dhe Victoria shpenzuan 38 milionë paund për të blerë 33% të aksioneve të Fuller në bizneset e futbollistit për të fituar kontrollin e plotë të “Beckham Brand Holdings”. Burimet pohuan në atë kohë se kishte probleme midis tyre, gjë e cila solli dhe fundin e partneritetit.
Më pas, Victoria ndoqi shembullin e bashkëshortit të saj dhe i dha fund bashkëpunimit me Fuller në gusht 2019. Ai ende zotëron aksione në kompaninë e saj të modës, por marrëdhënia dikur e ngushtë që kishte me familjen Beckham nuk ekziston më. Në fakt, thuhet se dyshja zgjodhën menaxherin e Justin Bieber dhe Ariana Grande-s, Scooter Braun, kur djali i tyre Cruz donte të bëhej yll i muzikës pop, duke e refuzuar Fuller-in pavarësisht karrierës së tij të shkëlqyer.
Pra, pavarësisht përpjekjeve, Victoria nuk do të jetë pjesë e turneut, si pasojë e konflikteve me menaxherin e grupit muzikor “Spice Girls”.
Artikuj të sugjeruar:
