Në episodin e 9-të të “The Dalina Show”, në Andale Media, një grua që vendosi të ruajë anonimitetin dhe përdori pseudonimin Alda, ndau një histori që shumë gra mund ta ndiejnë afër. Ajo tregoi për jetën e saj familjare prej 6 vitesh në të njëjtën shtëpi me vjehrrit, zgjedhje që në fillim dukej e natyrshme dhe plot dashamirësi, por që u kthye në një udhëtim të vështirë emocional.

“U shpërngula me vjehrrit kur isha 30 vjeç. Ishte një vendim që e mora me gjithë dëshirë. Bashkëshorti im është djali i vogël dhe mendova që, duke jetuar me ta, nuk do ndiheshin vetëm,” rrëfeu Alda. Por ndryshe nga pritshmëritë e saj, ajo nuk u prit si pjesë e re e familjes. “Në vend të mirëseardhjes, hasa një ftohtësi, një mur që më bëri të ndihesha si e huaj,” tha ajo.

Sipas Aldës, që në fillim u paragjykua se kishte hyrë në shtëpi për interes. “Mendonin se isha aty për t’ju ngrënë lekët, pa ditur që unë kisha një punë shumë të mirë. Me kalimin e kohës, e kuptuan që jo vetëm nuk po i merrja, por po i mbaja dhe ndihmoja edhe ata.”

Konfliktet u përkeqësuan edhe për shkak të kunatës – bashkëshortes së vëllait të burrit. “Më ndiqte në rrjetet sociale, komentonte tek prindërit e burrit për rrobat që vishja, sa kushtonin… Mendonte se m'i blinte djali i tyre, ndërkohë që unë punoja vetë. Kishte frikë se po humbte pushtetin që kishte në shtëpi.”

Sipas Aldës, raporti i saj me vjehrrën nuk ishte problem në fillim, por ndikimi i jashtëm bëri që situata të ndërlikohej. “Vjehrra ime është një njeri i jashtëzakonshëm. Por ndikohej nga nusja e djalit tjetër. Ajo i qëndronte gjithmonë pranë, dilte për kafe me të dhe postonte story sikur donte të më bënte xheloze.”

Madje, marrëdhënia me kunatën kishte marrë përmasa pasigurie dhe xhelozie të hapur. “Ajo më sheh si një kërcënim. Më ka thënë: ‘Ti ke ardhur pas meje këtu dhe duhet të rrish pas meje.’”

Alda shprehu gjithashtu se midis dy vëllezërve ekziston një marrëdhënie standarte, por ndihet një lloj rivalitet i heshtur, që është reflektuar edhe në marrëdhënien mes grave. “Ndoshta sepse burri im doli më i zoti në sytë e tyre. Ndoshta kjo ka krijuar edhe xhelozi për fëmijët tanë. Nuk do që ata të lidhen me njëri-tjetrin, por unë mundohem t’i bashkoj.”

Megjithatë, përkundër gjithçkaje, Alda tha se e ka ruajtur qetësinë dhe durimin. “Unë i kam vazhduar gjërat pa hatërmbetje. Më janë dashur shumë sakrifica emocionale për të mbërritur këtu.”

Në fund të ditës, ajo thotë se ka gjetur një mbështetje të vërtetë te vjehrra dhe te bashkëshorti i saj. “Ai më ka qëndruar gjithmonë pranë, më ka thënë të mos i kushtoj rëndësi veprimeve të kunatës, dhe asnjëherë nuk më ka lënë vetëm.”

Kjo është historia e një gruaje që vendosi të qëndrojë, të ruajë ekuilibrin dhe të ndërtojë marrëdhënie – edhe kur gjithçka rreth saj dukej se donte të provonte të kundërtën.

Episodi me rrëfimin e plotë:

Artikuj të sugjeruar: