Princi Harry ka deklaruar se është i dëshpëruar për të arritur pajtim me familjen mbretërore, por pretendon se babai i tij, mbreti Charles III, “nuk pranon të flasë me të”.
Në një intervistë tronditëse për BBC, Harry tha se marrëdhëniet e tensionuara me familjen kanë vijuar prej pesë vitesh dhe janë përkeqësuar pas vendimit të qeverisë britanike për t’i hequr atij sigurinë e financuar publikisht, pasi hoqi dorë nga detyrat mbretërore dhe u shpërngul në SHBA në vitin 2020.
“Ka pasur shumë mospajtime, shumë dallime mes meje dhe disa anëtarëve të familjes sime,” tha ai.
“Kjo situatë që vazhdon prej pesë vitesh, që ka të bëjë me jetën dhe sigurinë e njerëzve, është pika më kritike. Është e vetmja gjë që ka mbetur peng mes nesh.”
Harry pranoi se disa anëtarë të familjes nuk do ta falin kurrë për shumë gjëra, përfshirë edhe faktin që ai botoi librin autobiografik "Spare" në vitin 2023. Në atë libër, ai rrëfen një sherr fizik me princin William lidhur me marrëdhënien e tij me Meghan Markle, si dhe përmend skandale të mëparshme si kostumi nazist, për të cilin fajëson William-in dhe Kate Middleton-in.
Gjithashtu, ai pretendon se mbreti Charles ka bërë batuta se babai biologjik i Harry-t mund të ketë qenë një nga ish-të dashurit e princeshës Diana.
Pavarësisht gjithë këtyre, Harry thotë se do të dëshironte pajtim me familjen:
“Nuk ka kuptim të vazhdojmë të luftojmë. Jeta është e çmuar dhe nuk e di sa kohë ka mbetur për babain tim, sidomos pas diagnozës së tij me kancer në shkurt 2024.”
Megjithatë, ai theksoi:
“Ai nuk më flet për shkak të çështjes së sigurisë. Por do të ishte bukur të pajtoheshim.”
Nëse familja e tij nuk dëshiron të pajtohet, ai tha se kjo është një zgjedhje që u takon atyre.
Princi i dy fëmijëve – Archie, 6 vjeç dhe Lilibet, 3 vjeç – tha se nuk sheh një të ardhme ku do të kthehej me familjen në Mbretërinë e Bashkuar:
“Fëmijët e mi do të humbasin gjithçka që ka të bëjë me vendin tim të lindjes. Kjo është shumë e trishtueshme.”
Megjithatë, ai thekson se e do Britaninë dhe gjithmonë e ka dashur, “pavarësisht asaj që disa njerëz në atë vend kanë bërë”.
Harry shtoi se babai i tij ka fuqinë për ta zgjidhur këtë situatë:
“Në fund të fundit, gjithçka mund të zgjidhet përmes tij. Jo domosdoshmërisht duke ndërhyrë, por duke lejuar ekspertët të bëjnë atë që është e nevojshme.”
Reagimi i Pallatit Mbretëror
Pas publikimit të intervistës, një zëdhënës i Pallatit Buckingham reagoi duke thënë:
"Të gjitha çështjet që lidhen me sigurinë e dukës së Sussex-it janë shqyrtuar në mënyrë të pavarur, të hollësishme dhe të përsëritur nga gjykatat kompetente. Në çdo rast, është arritur i njëjti përfundim. Vendimet janë marrë nga RAVEC – një komitet i pavarur që vepron në përputhje me praktikat e sigurisë dhe në interes të sigurisë kombëtare. Këto nuk janë vendime që merren nga familja mbretërore individualisht dhe nuk mund të ndërhyhet në to nga ana e tyre.”
Artikuj të sugjeruar:
- Me shumë gjasa, Meghan & Harry nuk do e pëlqejnë planin që mund të ketë princi William për ta
- Princ Harry nuk qenka shumë i lumtur që Meghan Markle përdor fëmijët për reklamë
- Kjo është arsyeja pse familja mbretërore nuk mund të vendosë rripa sigurimi
- Princat William dhe Harry paskan përdorur të tjerë mbiemra para se të martoheshin
- Me finesën e saj tipike, Meghan Markle e hodhi një kunjë për familjen mbretërore
