Ka disa lajme që nuk kalojnë dot filtrin tonë editorial - jo se janë skandaloze, jo se s’kanë pak “lëng”, por se... le ta themi troç: nuk na bindin mjaftueshëm për t’i marrë seriozisht. Na falni shumë për mungesën e modestisë, por që…
Por ja që jetojmë në një botë ku dikush ka parë dikë me dikë, dikush ka bërë “unfollow”, dhe dikush tjetër ka postuar një citat pasivo-agresiv. Dhe njerëzit duan ta dinë.
“Kujdes, nuk janë lajme! Thjesht për muhabet” është vendi ku i lëmë të gjitha këto copëza - gjysmë të rëndësishme, gjysmë “për muhabet”, ndonjë thashethem që s’e kemi konfirmuar dot (po as e kemi marrë mundimin ta konfirmojmë) dhe disa detaje që ndoshta janë thjesht fryt i imagjinatës kolektive të rrjeteve sociale.
Këtu mund të gjeni gjithçka: nga “çfarë kanë thënë” te “mos e merr për të sigurt”, e deri te “hë, po këtë pse e lexova?”. Nuk janë lajme që do t’ju ndryshojnë ditën. Janë më shumë si ato reels-at që i sheh pa zë, pa dëshirë...por gjithsesi i sheh.
Nejse, le të shkruajmë për arsyen pse keni klikuar!
Livia takon babin
Livia, ish-banorja e “BBVA 4”, ose ish-e dashura e Mevlanit, njihe si të duash, është takuar me të atin e saj, pas vitesh të tëra. Ajo e përshkroi takimin si “të bukur, të natyrshëm” dhe u shpreh se u ndje sikur s’ishin ndarë kurrë. Më tej, ajo tregoi se babi e këshilloi që të ndërtonte gjërat e saj, sidomos në ekran, por edhe se ai ëndërronte që të bëhej gjysh.
Françeska Murati mbase po kalon një krizë në martesën e saj
Përflitet lart e poshtë e majtas-djathtas se Françeska Murati mund të jetë duke përjetuar një krizë në martesën e saj. Ajo ka dhënë ca sinjale të paqarta (nëse e ka fjalën për martesën ose jo), duke treguar se po përjeton një periudhë të vështirë në jetën e saj.
“Po kaloj një periudhë të vështirë. Nuk është diçka që unë e kam diskutuar haptazi. E dinë vetëm njerëzit e mi të afërt dhe ata që dua. Më kanë ndenjur afër dhe më kanë dhënë shumë dashuri. Jam shumë e ngarkuar. Po mundohem ta kaloj, përballoj. Jeta paska qenë shumë e vështirë. Çdo gjë ndodh për një arsye. Në një moment të dytë do flas hapur t’iu tregoj gjithçka që po ndodh në jetën time,” tha ajo në Instagram.
Sinan Hoxha frymëzohet nga Dafina dhe i dhuron gruas një super makinë!
Ju mbahet mend kur Dafina i dhuroi burrit të saj një Ferrari? Epo, le të nisë trendi! Sinan Hoxha i dhuroi të shoqes një Mercedes-Benz GLC! I dhuroi edhe një tufë me lule, i vendosi një fjongo të kuqe makinës dhe e bëri të lumtur të shoqen. “Faleminderit hubby”, shkroi Andrra dhe Sinani ia ktheu komentin: “Edhe 100 m ty janë pak, dashuri! Të dua”.
Grua e lumtur, jetë e lumtur!
Dua na paska sjellë të fejuarin në Shqipëri
I fejuari i Dua Lipës, Callum Turner paskërka vizituar Shqipërinë! Ai, bashkë me Duan erdhën për Pashkë, festuan në bregdetin shqiptar dhe Dua u ndje si në shtëpi. Bukur deri tani!
Gjesti rikthehet në shtëpi
Pas 184 ditë izolimi, 2 pjesëmarrjesh në “BBVA 4” dhe “BBVK” dhe dramash të shumta, Gjesti është rikthyer në shtëpinë e tij dhe na “qerasi” me një foto ku bëhet gati për të ngrënë. Të bëftë mirë Gjest’, dreka dhe fitorja!
Danja shfaqet me të dashurin
Redi tha, Redi bëri, Redi komentoi, fola me Redin…dhe më në fund, Redi u shfaq! Ai festoi me Danjën dhe për fatin e keq të G Ban-it duken super të lumtur. Le të triumfojë dashuria pra!
Ganiu thyen rregullat në “Ferma VIP”
Ganiu u fut në shtratin e Albës (askush s’e di pse iu duk e arsyeshme) gjatë kohës kur ajo po flinte dhe meqë theu rregullat e programit, u dënua! Atij do i zbriten 15 mijë euro nga vlera e çmimit të madh nëse zgjidhet fitues, pasi cenoi privatësinë dhe shkeli etikën.
E pabesueshme që në një program po zbatohen rregullat, apo jo?
Ish-e dashura e Don Xhonit është bërë nënë
Ish-çifti toksik i preferuar! Ariana Riley është bërë nënë për herë të parë dhe na e tregoi të gjithëve me një postim në Instagram. Edhe nëse e ka pasur block Don Xhonin, urojmë t’ia ketë hequr që edhe ai ta ketë parë, hehe!
Zhaklina thotë se marrëdhënia Egli-Gjesti është tipike “lidhje e gjeneratës Z”
Zhaklina Lekatari, e ftuar në “Wake Up”, dha (si të gjithë) mendimin e saj për lidhjen e Eglit dhe Gjestit. Ajo u shpreh se Gjesti ka qenë i manipuluar prej Eglit, si dhe iu referua marrëdhënies së tyre si "përfaqësuese e lidhjes së gjeneratës Z”.
“Më ka lënë një shije të marrëdhënies së gjeneratës Z, që nuk është një dashuri klasike, nga ato dashuritë me fejesa, martesa, unaza. Një marrëdhënie e gjeneratës së re, e cila, zihet, pajtohet, merret prapë, toksike, një marrëdhënie që lindi nga nevoja që të kem dikë që të mbështetem emocionalisht, që të bën të mbijetosh emocionalisht, dhe që është një ishull shpëtimi dhe një njeri që nuk të gjykon brenda kontekstit të Big-ut”, u shpreh ajo.
Nëna e Gjestit është krenare jo për lekët, por për sjelljen e të birit
Mami im? “Fitove mi, fitove, po sikur ta kishe hekuros’ çik këtë këmishën”.
Mami i Gjestit? Krenare për sjelljen e të birit!
E ëma e Gjestit foli pasi djali i saj fitoi “BBVA 4”, duke treguar ndjesitë e saj si një nënë krenare. “Jam nëna me e lumtur në botë, jo për çmimin por për sjelljen e tij”, tha ajo dhe fëmija brenda trupit tim i mbylli veshët se mami im s’më ka mburrur kurrë publikisht.
Egli poston video me Gjestin
“Dje, sot dhe nesër” tha Egli në videon e publikuar me Gjestin pas përfundimit të “BBVA 4” dhe ne s’jemi të sigurt nëse do të ketë një të nesërme…
Copyright Anabel.al / Ndalohet ribotimi pa lejen e redaksisë.
