"Eja, eja me muuaa...Një video seksi duuua" thoshte Big Mama në një prej këngëve të saj, por kur mendoi se pa vërtet skena seksi në "Ferma VIP 2" u skandalizua, madje, e kuptoi se njerëzit bëjnë seks dhe nisi të nxirte nga vendi kordat zanore! Edhe nëse nuk e sheh “Ferma VIP 2”, sërish mund të jesh hasur me video të ndryshme, ku Big Mama i ulëret Albës dhe e etiketon si “të pamoralshme” dhe “të pandershme”, sepse pretendon se ajo ka kryer marrëdhënie me një tjetër fermer, Lim Hotin.

Në debatet pa kokë e pa bisht, ku Big Mama s’është se ka ndonjë argument, por thjesht ofendime, ajo ulëret e çirret, për ta degraduar fermeren tjetër. Tani, le ta pranojmë se debatet janë të tepërta dhe po, Big Mamës nuk ka fare ç’i duhet se me kë bën seks Alba, kërcen në mënyrë provokuese apo jo etj, etj.
 
Le të nisim nga gjeneza: Pse Big Mama është kaq e shqetësuar për trupin e një vajze të rritur, e cila thotë që e ka qejf një djalë dhe do të flejë me të? Për ne nuk përbën asnjë problem, sepse fundja, synojmë të jetojmë në një botë të lirë, ku vajzat bëjnë atë që duan të bëjnë dhe nuk i gjykon një vajzë tjetër për trupin e tyre. Dhe në fakt, kjo nuk është utopi, por thjesht një e drejtë që duhet ta gëzojmë të gjithë. Edhe nëse Alba ka zgjedhur “të luajë” në këtë mënyrë që të arrijë larg në rrugëtimin e saj në “Ferma VIP” apo ka vërtet pëlqim për Limin, sërish nuk na mbetet as neve dhe as Big Mamës për ta gjykuar, por publikut që e voton.

Që të flasim troç, skenat erotike në TV nuk janë shumë të këndshme, sidomos kur nuk ka një paralajmërim "Emisioni duhet të shihet nga persona +18 vjeç", por s'besojmë se Big Mamma bezdiset nga kjo, por e ka personale me Albën. (Kujtojmë imitimet ofenduese, ose edhe sulmet e para që në momentin kur hyri në fermë). 
 
Dhe e dyta: Pse qenka Alba e pamoralshme, por Limi “shumë në rregull”?
 
Big Mama ia thotë shpesh Albës (e cila s'është personi që e mbron më shumë veten) që ai e përdor dhe e shfrytëzon për një natë, duke mos e ditur fare se ndoshta edhe Alba thjesht do të bëjë seks me Limin. Natyra e raportit të tyre nuk dihet, thjesht aludohet nga Big Mama, e cila nuk e bën shumë lidhjen e gojës me trurin dhe çirret vend e pavend për jetën e të tjerëve. 
 
Komentet e saj janë të mbushura me mllef, mizogjini dhe ndoshta është momenti që të bëhet një reagim nga vetë reality show. Se ç’bën Alba, Limi, unë, ti e të gjithë njerëzit në botë në krevat, për aq kohë sa është konsensuale dhe nuk po ndodh as edhe një veprim që nuk do ta kryejë pala tjetër, nuk duhet të përflitet me qëllim denigrimin dhe synimin për ta shigjetuar. Morali dhe nderi nuk bazohen në marrëdhënie seksuale, janë çështje parimore, të cilat nuk lidhen me dëshirat tona seksuale, ndaj le të largohemi nga stigmat që na kthejnë në shpellë dhe të jemi aq mendjehapur dhe feminstë sa Big Mama ka pretenduar në karrierën e saj.

Ta quash një vajzë “të pandershme” në një televizion publik është po aq e pavend, madje problematike, sepse edhe një herë, rikthehemi te kultura e denigrimit, linçimit dhe te pabarazia mes veprimeve (të njëjta) mes grave dhe burrave.