Moderatori dhe autori, Ermal Peçi, ka reaguar për herë të parë publikisht lidhur me pezullimin e papritur të programit të tij, “E Diela Jonë”, në RTSH. Në një postim në Instagram, ai shpjegon arsyet që çuan në ndërprerjen e programit, duke e cilësuar si një vendim të paarsyeshëm dhe jo të bazuar në kritere të ligjshme.
Në mesazhin e tij, Peçi shpjegon se programi u ndërpre papritur nga drejtimi aktual i RTSH-së, pa respektuar as procedurat ligjore të nevojshme. Ai e përshkruan ndërprerjen si një veprim që nuk ka asnjë bazë logjike dhe që shkel të drejtat e punonjësve dhe të publikut, që është përfituesi i një programi publik.
Peçi ka theksuar se ndërprerja e programit “E Diela Jonë” ka ndodhur pas dy sezonesh të suksesshme, ku programi kishte arritur një ndikim të madh, jo vetëm në ekran, por edhe në rrjetet sociale.
“Megjithatë, mes vendimesh të çuditshme dhe ndikimesh të pashpjeguara, programi u ndërpre. Dua të theksoj: RTSH nuk është pronë private. Është një institucion publik, dhe çdo program aty duhet të ekzistojë për publikun - jo të mbyllet mes sezonit,” shkruan ai.
“Unë nuk do të hesht dhe as nuk do të ndalem. Të gjithë ata që përpiqen të fshehin të vërtetën, le të kujtojnë se drejtësia është ende aty. Dhe do flasë. Shumë më shpejt se sa e mendojnë. Transparenca në një media publike është jo vetëm e nevojshme, por e detyrueshme. Dhe publiku ka të drejtë të dijë arsyet e vërteta të çdo vendimi që prek programet që ndjek, perqafon, shikon dhe klikon.”
Rasti i Ermali Peçit nuk është i vetmi i këtij lloji kohëve të fundit. Po ashtu, kanë ndodhur raste të tjera të ngjashme në RTSH, ku emisionet janë ndërprerë dhe moderatorët e njohur janë larguar papritur.
Elona Jaçellari foli publikisht për ndërprerjen e papritur të emisionit "Jetë Shqiptare", duke akuzuar drejtoreshën e RTSH-së, Aurora Polo, për një vendim të padrejtë dhe të paqartë, i cili erdhi pa paralajmërim dhe pa shpjegim të mjaftueshëm. Po kështu, në një intervistë për “The Dalina Show”, Alban Dudushi foli për largimin nga RTSH, duke kritikuar menaxhimin e brendshëm të institucionit dhe duke e cilësuar si një vendim të paarsyeshëm dhe të paqartë, të marrë nga një person që nuk kishte njohuri për punën që po bënte.
Situata e pasigurt dhe kaotike në RTSH po bëhet gjithnjë e më e dukshme. Fakti që emra të njohur të medias po flasin publikisht për padrejtësitë dhe vendimet e paarsyeshme sipas tyre, mund të tregojë për një mjedis të mbushur me burokraci dhe vendimmarrje të paqarta.
Anabel ka kërkuar informacion nga stafi drejtues i RTSH-së dhe drejtoresha Aurora Polo më 24 shkurt 2025, por nuk morëm kurrë një përgjigje, pavarësisht se e kanë detyrim ligjor bazuar në Ligjin Nr. 119/2014, "Për të Drejtat e Informimit".
