Tregu i punës po ndryshon me shpejtësi, ashtu si edhe qasja e punonjësve, veçanërisht kur një brez pason një tjetër (kemi shkruar disa herë për dallimet midis gjeneratës Z dhe brezave të tjerë). Ndër zhvillimet e reja është një prirje që New York Times, në një artikull të ri, e quan "mikro- pensionim".
Termi përdoret për të përshkruar vendimin e disa punonjësve që nuk janë ende në moshën e pensionit, por, në vend që të presin derisa ta arrijnë atë, gjejnë një zgjidhje tjetër. Ata bëjnë një pushim nga puna për të rigjeneruar energjitë, ndërsa në të njëjtën kohë mendojnë se si mund të kalojnë në një fazë tjetër të karrierës.
Kjo zgjedhje lë të kuptohet se ky vendim vjen pasi kemi krijuar mjaftueshëm kursime sa për të qëndruar për disa muaj të papunësuar. Përndryshe, ka nga ato persona që po zgjedhin gjithnjë e më shumë metodën e quajtur “dorëheqja e heshtur". Ky vendim parashikon ngadalësimin e ritmit në punë për të shmangur lodhjen e tepërt dhe për të krijuar një balancë më të shëndetshme mes karrierës dhe jetës personale.
Mikro-pensioni dhe ndikimi i tij
Duke iu rikthyer “mikro-pensionit”, një nga punonjëset e reja që mori këtë vendim është 27-vjeçarja Isabel Falls, e cila la punën e saj në New York dhe nisi të udhëtonte nëpër botë. Artikulli i New York Times e gjeti atë në Mexico City, ende duke pyetur veten se çfarë do të bënte me karrierën e saj.
Një grua tjetër, 30-vjeçarja Marina Kauser, dha dorëheqjen në dhjetor 2023 dhe mori tre muaj pushim nga puna për t'u fokusuar në gjëra të tjera që kishte lënë pas dore si pasojë e fokusimit në karrierë.
"Për herë të parë në jetën time si e rritur, nuk e pata këtë re të zezë të punës mbi kokën time," tha ajo.
Një tjetër grua, 35-vjeçarja Sandra De La Cruz, zgjodhi të bënte një pushim katër-mujor nga tregu i punës në vitin 2015. Ajo beson se puna e saj aktuale, si analiste, është rezultat i asaj periudhe, e cila i dha besimin për të menaxhuar pasigurinë në fushën e saj.
Burimi: Marie Claire
