Anija “Madleen” ndalohet nga ushtria izraelite në rrugën për në Gaza

Aktivistët në bordin e anijes “Madleen”, që po udhëtonte drejt Gazës për të shpërndarë ndihma humanitare, janë ndaluar nga forcat izraelite, sipas njoftimit të organizatës Freedom Flotilla Coalition (FFC).

Në një postim në Telegram, FFC bëri të ditur se kontakti me anijen është humbur dhe publikoi një fotografi ku shiheshin persona me jelekë shpëtimi dhe duart lart. Ministria e Jashtme izraelite deklaroi se anija po drejtohet "në mënyrë të sigurt drejt brigjeve izraelite" dhe se pasagjerët do të kthehen në vendet e tyre të origjinës.

Më pas, u publikua një video ku marina izraelite urdhëronte anijen të ndryshonte kurs dhe një tjetër ku shfaqeshin udhëtarët të padëmtuar.

Rusia pretendon se ka marrë 20% të territorit ukrainas

Ministria ruse e Mbrojtjes njoftoi se trupat e saj kanë arritur në skajin perëndimor të rajonit Donetsk dhe po vazhdojnë sulmin në rajonin fqinj, Dnipropetrovsk.

Kjo do të ishte hera e parë që trupat ruse futen në këtë zonë gjatë luftës trevjeçare. Ukraina ka mohuar pretendimet. Nëse konfirmohet, përparimi rus do të përbënte një goditje të rëndë për ushtrinë ukrainase, e cila tashmë përballet me vështirësi të mëdha në terren.

Ndërkohë, forcat ruse janë afruar edhe pranë qytetit të Sumit, nga i cili ishin larguar në fillim të luftës.

Tërmeti i fuqishëm godet Kolumbinë

Një tërmet me magnitudë 6.5 të shkallës Rihter goditi Kolumbinë të dielën, njoftoi Shërbimi Gjeologjik Kolumbian.

Tërmeti u regjistrua në një thellësi prej 10 kilometrash dhe u ndje në pjesën më të madhe të vendit. Epiqendra ishte 17 kilometra në verilindje të qytetit Paratebueno, rreth 186 kilometra në juglindje të kryeqytetit Bogota.

Nuk ka raportime për viktima, por pas lëkundjes së parë janë regjistruar disa tërmete të tjera në të njëjtën zonë. Megjithatë, lëkundjen e forta kanë shkaktuar panik te qytetarët.

Sulmohet me armë kandidati për president në Kolumbi

Senatori kolumbian, Miguel Uribe Turbay, kandidat për zgjedhjet presidenciale të vitit të ardhshëm, u qëllua me armë gjatë një tubimi elektoral në Bogota. 

Sulmi ndodhi në një park në lagjen Fontibon, ku persona të armatosur e qëlluan në shpinë. Pamjet në rrjetet sociale tregojnë Uriben, 39 vjeç, të mbuluar me gjak.

Partia e tij, Qendra Demokratike, e quajti sulmin një "akt të papranueshëm dhune". Autoritetet mjekësore raportuan se ai ndodhet në gjendje kritike dhe po i nënshtrohet ndërhyrjeve neurokirurgjikale dhe vaskulare.