Të gjithë ata që i përkasim brezit të Millennials (1981-1996) apo edhe brezave më të vjetër, sigurisht që e mbajnë mend kohën kur prindërit tanë kalonin orë të tëra në telefon, madje një telefon fiks, jo celular, duke folur me miq, të afërm, por edhe kolegë.
Disa nga ne arritëm ta jetojmë edhe si të rritur këtë periudhë. Megjithatë, kjo duket se ka ndryshuar rrënjësisht për brezat më të rinj.
Konkretisht, gjenerata Z (1997-2012), brezi i parë që jetoi krejtësisht brenda epokës së teknologjisë digjitale dhe internetit, jo vetëm që nuk preferon telefonatat si mjet komunikimi, por ka zhvilluar, në një përqindje të madhe, atë që quhet “telefobia”, frika dhe ankthi që shkaktohen nga vetë mendimi i një telefonate.
Në fakt, sipas një studimi të ri britanik, 56% e anëtarëve të gjeneratës Z stresohen nga një telefonatë, duke e lidhur atë me lajme të këqija. 23% e tyre shmangin t’i përgjigjen, edhe nëse e konsiderojnë të rëndësishme – për shembull, nëse vjen nga një punëdhënës.
68% shmangin t’i përgjigjen telefonatave nga numra të panjohur, por në këtë rast ka një bazë logjike: dyshojnë se mund të jetë mashtrim, pasi shumë nga këto telefonata tani bëhen përmes aplikacioneve të inteligjencës artificiale.
Siç shpjegon psikologia Dr. Charlotte Armitage, telefobia lidhet me atë që quhet ankthi shoqëror. Ndërsa brezat e mëparshëm ndoshta nuk kishin mundësi të tjera për të mbajtur kontakte me botën jashtë, të rinjtë sot zgjedhin rehatinë e një bisede me shkrim.
Dukua është kaq e përhapur, sa disa institucione, si Nottingham College, kanë filluar të ofrojnë trajnime për trajtimin e ankthit që shkaktojnë telefonatat. Pjesëmarrësit mësojnë rregullat e komunikimit telefonik dhe zhvillojnë aftësi të rëndësishme për të mundur të përballojnë situatat.
Për më tepër, siç konfirmojnë studimet, komunikimi është i rëndësishëm për suksesin personal dhe profesional, edhe në epokën digjitale.
Burimi: Marie Claire
