Nëse ke marrë një mesazh të çuditshëm me “Hello” nga një numër i panjohur, mos u mundo ta kuptosh kush është, sepse ka shumë mundësi që të jetë një mashtrim. Këto mesazhe të padëmshme në dukje janë pjesë e një skeme të njohur si “smishing” - një kombinim mes “SMS” dhe “phishing”, që synon të të bindë të përgjigjesh, të klikosh mbi një link ose të japësh të dhëna personale apo bankare.

Çfarë fshihet pas këtij mesazhi?

Ky “Hello” i pafajshëm është në fakt një test. Mashtruesit po përpiqen të zbulojnë nëse numri yt është aktiv. Nëse u përgjigjesh, qoftë edhe me një “???” ose “Më fal, numër i gabuar”, ti sapo u ke konfirmuar se ky numër është real dhe mund të përdoret për skema të tjera mashtrimi.

“Nëse po përdorin një algoritëm për të gjeneruar qindra mijëra numra të rastësishëm, po përpiqen të zbulojnë cilët numra janë aktivë dhe të lidhur me një person të vërtetë,” shpjegon Maril Vernon, eksperte e sigurisë kibernetike.

Në rastet më të këqija, ky “Hello” është vetëm fillimi i një bisede që synon të fitojë besimin tënd. Mashtruesit mund të hiqen si një person që të njeh, një kompani me të cilën ke pasur kontakt, një shërbim transporti që të kërkon të paguash një tarifë të vogël, ose madje edhe një institucion qeveritar. Ti mund të mendosh se po paguan për një paketë të humbur, por në fakt po jep të dhënat e kartës së kreditit.

Nëse u përgjigjesh njëherë, prit më shumë mesazhe nga numra të tjerë të panjohur, sepse tashmë e dinë që ke një numër aktiv. “Nëse nuk përgjigjesh më, ata thjesht do të përdorin një numër tjetër për të të kontaktuar sërish,” thotë Vernon.

Çfarë të bësh kur merr një mesazh të tillë?

Mos mendo se duhet të jesh i sjellshëm apo i politizuar - këto mesazhe janë një skemë, jo një person që kërkon ndihmë! Ja si të mbrohesh:

1. Mos u përgjigj fare!

Sado tunduese të jetë ta kthesh një “Më fal, kush je?” ose “Numër i gabuar”, mos e bëj. Më mirë trajtoje mesazhin si të mos kishte ardhur kurrë.

2. Fshije dhe raportoje si mesazh të padëshiruar.

• Në iPhone, poshtë mesazhit do të shfaqet opsioni “Report Junk”. Kliko “Delete and Report Junk” për ta larguar menjëherë.

• Në Android, mund të klikosh mbi numrin, të zgjedhësh opsionin “Spam” dhe ta bllokosh menjëherë.

3. Ndrysho fjalëkalimet nëse ke thënë më shumë seç duhet.

Nëse e ke gjetur veten duke u përgjigjur apo duke dhënë informacione personale, mos e lër me aq. Ndrysho menjëherë fjalëkalimet dhe përdor një program të besueshëm për të skanuar telefonin nga ndonjë virus i mundshëm.

Në përgjithësi, nëse të shkruan dikush që nuk e ke në kontaktet e tua, supozoje si një përpjekje mashtrimi. Në botën e sotme digjitale, pak dyshim të shpëton nga shumë telashe!