“Kam një shoqe që shpesh më bën të pyes veten: Si ka mbijetuar deri tani? Jo sepse është keqdashëse, jo sepse ka bërë ndonjë gjë të tmerrshme, por thjesht sepse i mungon ajo lloj zgjuarsie që të ndihmon të jetosh jetën. Dhe kjo më ka bërë të kuptoj diçka thelbësore: të jesh i zgjuar në shkollë nuk do të thotë se je i zgjuar në jetë.

Në shkollë, ajo ka qenë nxënëse e shkëlqyer. Nota të larta, analiza të përpikta letrare, ushtrime matematike të zgjidhura me një lehtësi të frikshme. Zyshat e quanin “shembull për t’u ndjekur,” prindërit krenoheshin dhe të gjithë mendonin se ajo do të kishte një të ardhme të ndritur. Por sapo u përball me botën e vërtetë, gjithçka ndryshoi.

Ajo nuk dinte të menaxhonte kohën. Në shkollë, oraret ishin të paracaktuara, detyrat e dhëna, dhe mjaftonte të ndiqje një sistem të vendosur nga të tjerët. Në jetë? Askush nuk i thotë se kur duhet të dërgojë një email, kur duhet të bëjë pagesat, apo si të organizojë një udhëtim pa humbur rrugëve. Rezultati? Humb shumë afate, harxhon më shumë para seç duhet dhe shpesh përfundon në situata që dikush tjetër do t’i kishte shmangur me pak logjikë.

Pastaj, vjen çështja e marrëdhënieve njerëzore. Në shkollë, mjafton të jesh njeri i mirë dhe të punosh fort për t’u vlerësuar. Në jetë? Jo dhe aq. Nuk është gjithçka bardh e zi. Ajo nuk e dallon kur dikush po e shfrytëzon, nuk e kupton kur një shef po e manipulon dhe beson se njerëzit janë gjithmonë të sinqertë. Kjo e ka futur në disa situata të pakëndshme, duke e bërë të kuptojë se zgjuarsia akademike nuk të mëson si të lexosh njerëzit.

E njëjta gjë vlen edhe për vendimmarrjen. Në shkollë, gjithçka është e qartë: ka një përgjigje të saktë dhe një të gabuar. Në jetë, shumica e zgjedhjeve janë gri. Ajo shpesh ngurron të marrë vendime sepse kërkon siguri absolute, por bota reale nuk funksionon kështu. Jo çdo vendim ka një manual përdorimi dhe ndonjëherë duhet të rrezikosh, të provosh, të gabosh dhe të mësosh.

Ironia më e madhe? Ajo e kupton që nuk është e përgatitur për jetën, por nuk e di si ta ndryshojë këtë. Sepse shkolla nuk të mëson si të përballesh me dështimin, si të mbrosh veten nga njerëzit e gabuar apo si të ndërtosh një jetë që nuk bazohet vetëm në rregulla dhe teori. Dhe për të qenë e sinqertë, shumë njerëz bien në të njëjtën grackë.

Ndaj, herën tjetër kur dikush të të thotë se të qenit i zgjuar në shkollë është gjithçka, kujtohu për shoqen time - vajzën që di çdo formulë matematike përmendësh, por nuk di si të gjejë një apartament me qira pa u mashtruar. Se fundja, jeta nuk është një provim me përgjigje të sakta, por një labirint ku duhet të dish si të lëvizësh. Dhe kjo, fatkeqësisht, nuk mësohet në libra shkollorë.” - shkruar për Anabel nga një shoqe e sinqertë.

Artikuj të tjerë nga rubrika Unpopular Opinion: