Këngëtarja Dafina Zeqiri u është përgjigjur kritikave që lidhen me performancat e saj gjatë shtatzënisë. Përmes një Instastory, ajo shprehet se skena është terapi për të dhe kështu ka qenë gjithmonë, ndaj e tillë do të jetë edhe në këtë fazë të jetës.
Dafina nënvizoi se ajo nuk performon për shkak të të ardhurave financiare, por thjesht sepse ndihet e lumtur.
“Unë jam shtatzënë dhe vazhdoj të performoj në koncerte, sepse kjo është arsyeja përse e kam nisur këtë rrugëtim që në fillimet e mia. Që nga fëmijëria, performanca dhe muzika kanë qenë terapi për mua – më kanë ndihmuar të përballem me depresionin, të shprehem lirshëm dhe të përballoj sfidat e jetës, qofshin ato emocionale apo fizike. Edhe kur nuk jam ndier mirë, skena ka qenë vendi im i shërimit”, ka shkruar ajo.
Dafina shton se vajzat dhe gratë duhet të bëjnë atë që duan gjatë shtatzënisë, pasi kjo nuk është një periudhë ku jeta ndalon.
“E bëj këtë punë jo për para, por nga dashuria e pastër për muzikën dhe artin. Besoj se çdo grua ka të drejtën dhe fuqinë të vazhdojë karrierën e saj gjatë shtatzënisë, për sa kohë është e shëndetshme dhe ka një shtatzëni të sigurt. Të jesh shtatzënë nuk do të thotë se je e sëmurë apo se duhet të ndalosh jetën tënde."
Dafina e njoftoi lajmin e shtatzënisë në janar të këtij viti, duke bërë të ditur që pret të sjellë në jetë një djalë.
Ajo dhe biznesmeni, Kreshnik Gjergji janë prej kohësh në një lidhje romantike që ka qenë vazhdimisht në qendër të vëmendjes.
Artikuj të sugjeruar:
