Një teaser i shpërndarë me shpejtësinë e erës ka ngjallur kureshtje: një Dalina Buzi e sinqertë, e vendosur për të mos thënë diçka me skenar, e gatshme të rrëfehet pa filtra. “Unë realisht nuk e di çfarë do them,” dëgjohet të thotë drejtuar nga stafi që në sekondën e parë, duke shpalosur një anë të re të saj.
View this post on Instagram
“The Dalina Show” sipas Dalinës nuk është thjesht një show. Nuk ka skenografi madhështore, drita neon apo spektakël të programuar me kërcimtarë edhe pse, siç thotë vetë ajo, “edhe mund të kërcejmë mbi tavolinë.” Por thelbi është tjetërkund: në një rrugëtim të brendshëm, në tema që na prekin të gjithëve, në reflektime që shkojnë përtej një programi televiziv.
Spoiler alert! Psikoterapi në episodin e parë?
Për ta nisur këtë udhëtim, Dalina zgjedh të bëjë diçka që nuk është parë më parë në një format të tillë: një seancë terapie, me psikologen Jonarda Kërkuti. Ndoshta mes të gjithë të ftuarve këtë herë iu desh të zgjidhte veten. Ky episod është një përballje e vërtetë me veten, me dyshimet, frikërat dhe transformimin personal.
“Unë jam në një proces transformimi,” dëgjohet të thotë në teaser, duke e bërë të qartë se ky nuk është thjesht një show, por një eksperiencë e ndarë me publikun. “Të gjitha këto gjërat për të cilat flasim ndonjëherë janë shpëtimi ynë. Këto më interesojnë mua në program.” Për të dhënë shembullin e parë, ajo zgjedh të jetë vetë e para që shkon në terapi para syve të publikut.
“Unë sot në fakt do të doja që ta filloja me veten,” thotë ajo, e ulur përballë Jonardës, e gatshme të hapet dhe të ndajë jo vetëm sukseset, por edhe luftërat e brendshme. “Më dhimbset vetja… është si luftë,” dëgjohet të thotë, në një moment që rrëzon çdo filtër dhe sjell një nga momentet më të forta të këtij episodi të parë.
“The Dalina Show” nuk do të sjellë thjesht intervista e nuk do të fitojë në kurriz të të ftuarve që qajnë. Do të jetë një rrugëtim i sinqertë, një hapësirë për të folur për ato që ndonjëherë i shmangim.
Emisioni nis sonte në orën 20:00 në kanalin e Andale në Youtube. Një nisje ndryshe, një Dalinë ndryshe!
