Ukraina zgjat edhe për 90 ditë gjendjen e luftës

Parlamenti i Ukrainës ka vendosur të zgjasë gjendjen e luftës dhe mobilizimin e përgjithshëm në vend edhe për 90 ditë.

“Ukraina ka dashur gjithmonë paqe dhe i ka ofruar shumë herë në formate të ndryshme negociuese udhëheqjes ruse për t’i dhënë fund luftës dhe për të çliruar tokën ukrainase”, -tha presidenti Volodymyr Zelensky.

Ai shtoi se Rusia, beson te terrori dhe vazhdon të besojë “iluzionet e saj propagandistike dhe shpreson se do të arrijë diçka përmes formave të ndryshme të shantazhit –por nuk do ta bëjë”.

Zelensky theksoi se Ukraina duhet të mbrohet dhe se sa më e fortë të jetë, aq më e dobët do të jetë Rusia dhe lufta do të zgjasë më pak. 

Krizë energjitike: Edhe Zvicra paralajmëron reduktime të energjisë elektrike

Ministrja zvicerane e Energjisë, Simonetta Sommaruga ka paralajmëruar një sërë opsionesh për reduktimin e energjisë elektrike. Ajo u shpreh se pavarësisht se vendi po bën gjithçka për të parandaluar një mungesë, duhet kujtuar se në Europë ka luftë dhe s'ka siguri. 

Ministrja shtoi se miratimi i një objektivi të kursimit të energjisë prej 15% si ai i Bashkimit Europian do të “kishte kuptim”, por qeveria do të merrte vendimin përfundimtar.

Komentet e saj vijnë pasi kreu i komisionit të energjisë elektrike u kritikua sepse i bëri thirrje qytetarëve që të blejnë qirinj dhe dru zjarri përpara dimrit.

Sipas Putin, Rusia është e gatshme të armatosë aleatët e saj

Kreu rus, Vladimir Putin deklaroi se Moska është e gatshme të ofrojë armë moderne për aleatët e saj duke përmendur këtu Amerikën Latine, Azinë dhe Afrikën. 

Deklaratën, Putin e dha gjatës fjalës në hapjen e ceremonisë “Ushtria 2022” që u zhvillua pranë Moskës.

“Ne jemi gati t’u ofrojmë aleatëve tanë llojet më moderne të armëve, nga armët e vogla te mjetet e blinduara dhe artileria deri te aviacioni luftarak dhe mjetet ajrore pa pilot”, - u shpreh presidenti.

Ndërkohë, Rusia është zotuar  gjithashtu të zgjerojë marrëdhëniet gjithëpërfshirëse dhe konstruktive dypalëshe me Korenë e Veriut.

Sulmi ndaj shkrimtarit Salman Rushdie: Irani mohon në mënyrë kategorike të ketë lidhje me ngjarjen

Irani ka mohuar “kategorikisht” çdo lidhje me sulmuesin e Salman Rushdie, duke fajsuar vetë shkrimtarin për çfarë ndodhi.

Rushdie doli nga intubimi pak ditë më parë dhe është në gjendje të flasë pasi ka pësuar lëndime të rënda me thikë. Ai u sulmua teksa po fliste në një panel për lirinë e shprehjes në Institutin Shatakua.

Fillimisht, Teherani ka heshtur për sulmin, por sekretari amerikan i Shtetit, Antony Blinken, dënoi mediat shtetërore iraniane për reagimin e tyre.

Sulmuesi që po akuzohet për sulmin ndaj autorit të romanit kundërthënës “Vargjet Satanike”, është deklaruar i pafajshëm për veprat: tentim-vrasje dhe sulm, por prokurorët thanë se ky ka qenë një krim i planifikuar.

Burimi: BBC, CNN