U deshën plot gjashtë vite që Katy Perry dhe Taylor Swift të bëheshin shoqe sërish. Mesa duket, të dyjave po u shijon shumë paqja e vendosur me njëra-tjetrën.
Kaq u desh që fansat të kërkonin një bashkëpunim, gjasat e të cilit nuk janë të pakta.
Marrëdhënia Taylor-Katy mori të tatëpjetën në vitin 2013 dhe shoqëria i la vendin armiqësisë. Gjithçka nisi pasi disa balerina që punonin për të dyja palët, lanë turneun “Red” të Taylor-it për të performuar në “Prism” të Katy Perry-t, e cila asokohe u lidh me ish-të dashurin e Swift-it, kantautorin John Mayer. Menjëherë Taylor publikoi këngën “Bad Blood” dedikuar një shoqërie që përfundonte në tradhti.
Por as Katy nuk mbeti pas dhe lançoi këngën “Swish Swish” me Nicki Minaj, ku nisur nga teksti, referencat për sherrin me ish-shoqen ishin mëse ta qarta. "Është qesharak fakti që emri im vijon të dalë nga goja jote,” shprehej Katy Perry, duke iu drejtuar një personi që i bën gjërat me llogari dhe që flet vazhdimisht për të. Ndërsa në një tjetër pjesë të tekstit, theksonte: “Je po aq e lezetshme sa një kupon i skaduar dhe karma nuk është gënjeshtare, ajo i mban faturat.”
Në maj të vitit të kaluar, nisën edhe zërat se raporti mes tyre u qetësua, pasi Katy i nisi Taylor-it një degë ulliri si shenjë për t’u pajtuar.
