_{Ju prezantojmë me rubrikën e re, Unpopular Opinion. Të gjitha kemi disa mendime që, nëse i themi me zë të lartë, na duket sikur do përfundojmë në burg. Jo sepse janë domosdoshmërisht të gabuara, por sepse janë…ndryshe. Nuk janë ato që shoqëria pret të dëgjojë, nuk janë të mbështetura nga masa dhe, mbi të gjitha, nuk janë të përshtatshme për t’u thënë në tavolinën e drekës me familjen. Këto janë ato mendime që i mbajmë për vete, i ndajmë vetëm me miqtë ose thjesht kafshojmë buzët për t’i mbajtur brenda. Unpopular opinions janë pikërisht ato mendime që shumica i konsideron të çuditshme, të guximshme ose thjesht të gabuara. Por jo çdo mendim që del jashtë rregullave është domosdoshmërisht i gabuar. Pra, ka ardhur koha të themi disa të vërteta jo aq të famshme.}

"Mbase do më thoni "Po kush tha që është problem se miliona persona janë lidhur prej rrjeteve sociale", por ju siguroj që po tregoheni hipokritë. Të jemi të sinqertë tani, të gjithë i paragjykojmë çiftet që janë njohur nga djali që ka reaguar me një emoji me sytë me zemra tek story i vajzës. Ok, ok, ende do e vija në dyshim një lidhje të tillë prej faktit që kjo vajza i ka kthyer përgjigje një mesazhi të tillë, por dua të them: jetojmë në epokën e f*cking internetit!

E diii, që jeni "old school" dhe preferoni mënyra më organike për të njohur njerëz të rinj, po më thoni pak ju lutem kur ishte hera e fundit që ju afrua një djalë në rrugë për t’ju kërkuar numrin? Ose kur e mblodhët guximin dhe i thatë më në fund asaj super yllit te puna që të pinte një kafe me ju? Pikërisht.

E doni apo jo internetin, ai e ka kryer me kohë efektin e vet dhe tani në 2025-ën ekziston "ankthi social". E kuptoni nga thonjëzat besoj se dhe unë s’jam e lumtur me pikën ku kanë arritur gjërat, por duhet të pranojmë realitetin.

Plus, nuk qëndron shumë argumenti i njohjes "joorganike" sepse në rastin më të mirë, personi të cilit do t’i shkruash, a të shkruan, ka një faqe personale nga e cila kupton me çfarë merret, si mendon, madje madje edhe gjëra më të thella si komplekset!!

Jemi të rritur mjaftueshëm që të mos i besojmë profilit të atij personit që poston vetëm nga udhëtimet e veta dhe dreka-darkat nëpër vende të mira. Këta robotë Instagrami s’të japin muhabet as online, jo më t’u japësh një shans për t’i takuar live (po mbase duhet t’ju dërgoj një tjetër Unpopular Opinion për këtë hahaha).

Pastaj, përtej shakave për ankthin social, a nuk është 100 herë më mirë kur e shmang kafenë e parë me atë tipin që të duket super i lezetshëm në fillim, po pastaj del që "do goc për shpi"? Ose ose, atë që të pyet për numrin e të dashurve apo partnerëve seksualë. Gocat e dinë që tipa të tillë janë të neveritshëm dhe është lehtësim i madh të kesh lirinë e të mos kthyerit kurrë përgjigje duke i dërguar atje ku e meritojnë: te koshi i harresës.

Pra, mes skeptikëve që diskutojnë ende a duhet të ekzistojnë rrjetet sociale apo jo, dua t’ju them miqësisht që të mos e ndrydhni veten me këto idealet boshe dhe hapeni atë Instagram, Tinder, a Facebook qoftë, vetëm për të provuar shanset tuaja! Kush ndan mendim të kundërt, bujrum jam gati të luftojmë,” – shkruar për Anabel nga një vajzë e lodhur nga djemtë frikacakë.

Shënim: Artikulli është përshtatur nga redaksia për qëllime editoriale dhe qartësie. Copyright Anabel.al / Ndalohet ribotimi pa lejen e redaksisë.

Të tjerë "Unpopular opinions":