^{Ju prezantojmë me rubrikën e re, Unpopular Opinion. Të gjitha kemi disa mendime që, nëse i themi me zë të lartë, na duket sikur do përfundojmë në burg. Jo sepse janë domosdoshmërisht të gabuara, por sepse janë…ndryshe. Nuk janë ato që shoqëria pret të dëgjojë, nuk janë të mbështetura nga masa dhe, mbi të gjitha, nuk janë të përshtatshme për t’u thënë në tavolinën e drekës me familjen. Këto janë ato mendime që i mbajmë për vete, i ndajmë vetëm me miqtë ose thjesht kafshojmë buzët për t’i mbajtur brenda. Unpopular opinions janë pikërisht ato mendime që shumica i konsideron të çuditshme, të guximshme ose thjesht të gabuara. Por jo çdo mendim që del jashtë rregullave është domosdoshmërisht i gabuar. Pra, ka ardhur koha të themi disa të vërteta jo aq të famshme.}"Jo po “Egli e do për famë”, jo po “është Xumi i dytë”… Për mendimin tim, Gjesti ka po aq faj sa Egli, në mos më shumë.

Të gjithë mund të kemi pasur në jetën tonë dikë që as na donte, as na urrente - thjesht na mbante pezull, duke na lënë me ndjenja të përziera. Një marrëdhënie që nuk jep as sigurinë e një dashurie, por as lirinë e një refuzimi të qartë. Dhe në këto raste, ajo që dhemb më shumë nuk është refuzimi, por iluzioni që të lë pezull, të jep shpresë dhe pastaj të rrëzon sërish.

Egli, në këtë histori, nuk është ajo që po mban dikë pezull. Pra, tha që nëse do donte dikë do e thoshte dhe e tha! Ndërsa me Xumin e tha troç se nuk ka asnjë shans mes tyre dhe i qëndroi fjalës. Ajo nuk dha asnjë shpresë të rreme, nuk ngatërroi askënd me sinjale kontradiktore dhe kur ndjeu pëlqim për dikë tjetër, e tha hapur. Kjo është mënyra e duhur për të refuzuar dikë - qartë, drejt, pa lojëra dhe pa lënë dyshime. 

Në fakt, Egli më kujton Luizin, që iu qep Kiarës derisa ajo e pranoi. Ai këmbënguli, ajo këmbënguli, por stereotipet janë ato që bëjnë të duket anormale një gocë që “gjuan” një çun e para. Nëse një djalë këmbëngul, thuhet se është i përkushtuar dhe romantik, por kur një vajzë bën të njëjtën gjë, papritur është “e etur për vëmendje” ose “e fiksuar.” Në rastin specifik “e do për famë”.

Ndërsa Gjesti? Ai është historia tipike e “tërhiq e mos e këput.” Në momentin që Egli distancohet, ai kërkon ta afrojë. Kur sheh që Egli fillon të ketë respekt për veten dhe largohet, ai e rrëzon me një veprim të vogël - një fjalë, një përqafim, një sjellje që e bën të besojë se ndoshta ka diçka aty. Një ditë e përqafon, të nesërmen e bën të duket si e fiksuar. Një ditë e mban afër, të nesërmen e lë të humbasë në paqartësi.

E pra, kush është vërtet fajtori në këtë histori?" - shkruar për Anabel.al nga një shikuese e rregullt e "Big Brother VIP Albania".

Shënim: Artikulli është përshtatur nga redaksia për qëllime editoriale dhe qartësie. Copyright Anabel.al / Ndalohet ribotimi pa lejen e redaksisë.