Komplimentet zakonisht shihen si shprehje pozitive të vlerësimit ose admirimit. Megjithatë, jo të gjithë i presin mirë ato.
Nisur nga rasti i Heidit në “Fan Club”, ku në dy raste i është shprehur Gert Ferrës dhe Bled Manes të ndalojnë së quajturi atë “zemër” apo së komplimentuari pamjen e saj, pse disa individë reagojnë negativisht ndaj diçkaje që ka në parim qëllimin t'i bëjë ata të ndihen mirë?
Probleme me vetëvlerësimin
Kur dikush nuk e sheh veten të denjë për lavdërime, mund të ndihet sikur komplimentet ndaj tyre janë ose të pavlefshme, ose jo të sinqerta.
Në vend që ato t'u rrisin besimin në vetvete, komplimentet mund të shkaktojnë dyshim në vetvete ose madje ndjenjë faji, duke i bërë ata të ndihen si të mashtruar.
Frika nga pritshmëritë
Disa individë i shohin komplimentet si një formë presioni. Nëse lavdërohen për një karakteristikë ose arritje të caktuar, mund të ndjehen të detyruar të shfaqen gjithmonë në atë nivel.
Dyshimi për motivet e fshehura pas komplimenteve
Disa njerëz përdorin i lavdërimet si një mjet për manipulim ose bindje. Ata që e kanë përjetuar këtë më parë mund të zhvillojnë një dyshim të përgjithshëm ndaj komplimenteve, duke supozuar se ato vijnë me motive të fshehura.
Parehatia nga vëmendja
Të jesh në qendër të vëmendjes, qoftë edhe për pak minuta, mund të ndihet si mbingarkesë për introvertët. Një kompliment mund t’i bëjë ata të ndihen të ekspozuar, në vend që të ndihen të vlerësuar.
Ndikimet e kulturës dhe rritjes
Në disa kultura, modestia është shumë e vlerësuar, dhe pranimet e hapura të komplimenteve mund të shihen si arrogancë. Po ashtu, individët e rritur në mjedise ku lavdërimet kanë qenë të rralla për ta, mund të kenë vështirësi të pranojnë fjalët pozitive pa ndjerë shqetësim.
Sindroma e mashtruesit
Sindroma e mashtruesit është një fenomen psikologjik ku individët dyshojnë për arritjet e tyre dhe kanë frikë se mos dalin si të rremë përballë të tjerëve kur komplimentohen prej tyre.
Ata që e përjetojnë këtë shpesh, i hedhin poshtë komplimentet sepse ndihen sikur nuk janë të vlefshme për ta. Në vend që të pranojnë lavdërime, ata mund të besojnë se thjesht kanë pasur fat ose se të tjerët po i vlerësojnë më shumë sesa duhet aftësitë e tyre.
Përvoja negative të kaluara
Njerëzit që janë tallur, ngacmuar ose janë përballur me komplimenta të pasinqerta në të kaluarën, mund të bëhen të kujdesshëm ndaj të gjitha formave të lavdërimit.
Artikuj të sugjeruar:
- “Puberteti i dytë”: Çfarë është dhe si ndikon në trupin tënd?
- Privilegji i bukurisë është i vërtetë dhe ky studim na e provon
- Pse komplimentet për humbjen e peshës nuk janë gjithmonë ide e mirë
- Metoda e “gurit gri”: Si të përballoni personat toksikë pa u përfshirë emocionalisht
- Ka 5 mënyra për të dhënë përshtypjen e parë: Cila është e jotja?
