Autoritetet greke janë në gatishmëri në Santorini pasi u regjistruan më shumë se 200 tërmete nënujore, duke bërë që të merret vendimi për t’u mbyllur shkollat dhe për t’u vendosur ekipe emergjence.
Megjithëse tërmetet nuk janë të lidhura me vullkanin (kujtojmë se Santorini është një ishull vullkanik) aktiviteti sizmik në rritje është shqetësues.
"Këto masa janë paraprake dhe autoritetet do të jenë vigjilente," tha ministri i Mbrojtjes Civile, Vasilis Kikilias, të dielën vonë pas një takimi urgjent të qeverisë në Athinë. “Ne u bëjmë thirrje qytetarëve që t'i përmbahen rreptësisht rekomandimeve të sigurisë për të minimizuar rrezikun.”
Ekspertët grekë thonë se tërmetet, shumë me magnitudë mbi 4.5 ballë, nuk janë të lidhura me vullkanin e Santorinit, megjithatë pranojnë se modeli i aktivitetit sizmik është shqetësues.
“Nuk kam ndjerë kurrë diçka të tillë dhe me një frekuencë të tillë - një tërmet çdo 10 ose 20 minuta. Të gjithë janë në ankth edhe nëse disa prej nesh e fshehin për të mos shkaktuar panik, por të gjithë janë të shqetësuar,” tha Michalis Gerontakis, i cili është edhe drejtor i Orkestrës Filarmonike të Santorinit.
Banorët dhe vizitorët u këshilluan të shmangin grumbullimet e mëdha dhe zonat ku mund të ndodhin rrëshqitje gurësh. Disa banorë dhe punëtorë vendas iu drejtuan agjencive të udhëtimit për të kërkuar bileta avioni ose trageti për t'u larguar nga ishulli.
Sizmologu i shquar grek Gerasimos Papadopoulos paralajmëroi se sekuenca aktuale e tërmeteve mund të tregojë një ngjarje më të madhe të afërt, pra një tërmet më të fortë.
"Të gjithë skenarët mbeten të hapur," shkroi Papadopoulos në një postim në internet. “Numri i lëkundjeve është rritur, magnitudat janë rritur dhe epiqendrat janë zhvendosur në verilindje. Ndonëse këto janë tërmete tektonike, jo vullkanike, niveli i rrezikut është përshkallëzuar.”
Për informacion shtesë, mund të lexoni edhe: “Është vetëm çështje kohe para se Santorini të goditet nga një vullkan, thonë shkencëtarët”
Burimet: Associated Press, Reuters
