A ju ka ndodhur ndonjëherë të mendoni se njerëzit tërheqës e kanë më të lehtë në jetë? Nuk është thjesht një iluzion - një studim i ri tregon se bukuria ndikon drejtpërdrejt në financa dhe sukses profesional.
Sipas kërkimit të publikuar në “INFORMS Journal Information Systems Research”, njerëzit tërheqës fitojnë mesatarisht 2.4% më shumë pagë sesa ata me pamje më “të zakonshme”. Në një periudhë 15-vjeçare, kjo diferencë arrin në rreth 2,508 dollarë më shumë në vit. Dhe nëse dikush është ndër 10% më tërheqësit, përfitimi është edhe më i madh - deri në 11% më shumë pagë ose rreth 5,528 dollarë në vit.
Studimi analizoi karrierën e mbi 43,000 të diplomuarve në MBA, ku pjesa më e madhe ishin burra (71%) dhe të bardhë (81%). Vlerësimi i bukurisë u bë në bazë të karakteristikave të pandryshueshme, si struktura e fytyrës, dhe jo elementeve të tilla si flokët apo grimi. Rezultatet treguan se 15 vite pas diplomimit, një person tërheqës ka 52.4% më shumë gjasa të ketë një pozicion më të lakmueshëm sesa një koleg me pamje mesatare.
Por, privilegji i bukurisë nuk është pa kosto. Studimi vë në dukje se të qenit tërheqës mund të sjellë edhe sfida në mjedisin e punës, si vëmendja e padëshiruar ose ngacmimet seksuale, veçanërisht për gratë, duke qenë se shumica e pozicioneve drejtuese janë të mbajtura nga burra.
Sipas studiuesve, ky fenomen tregon se suksesi profesional nuk varet vetëm nga aftësitë dhe kualifikimet, por edhe nga mënyra se si shoqëria percepton bukurinë. Nëse dikur mendonim se privilegji i bukurisë ishte thjesht një mit, tani kemi prova konkrete që ai ndikon në karrierë - dhe madje në llogarinë bankare.
Artikuj të sugjeruar:
