Mëngjes, mesditë apo mbrëmje - koha ideale për të shijuar një filxhan kafeje varet nga ju. Shumë prej nesh e fillojnë ditën me një kafe sapo bie zilja e alarmit, madje disa e vendosin ekspresin të bëjë kafen përpara se të ngrihen nga shtrati.
“Kafeja e mëngjesit është një ritual global,” thotë dietologu Anthony DiMarino. “Kur kjo rutinë prishet, ndihesh sikur diçka nuk shkon.”
Por a duhet të shtyni orarin e pirjes së kafesë? Sipas ekspertëve, nuk ka një përgjigje të prerë. Disa besojnë se kafja e parë (ose e dytë) duhet të pihet në mes të mëngjesit ose pasdite, ndërsa të tjerë këmbëngulin se gjithçka varet nga organizmi juaj.
Kafeja në mëngjes
Një filxhan kafe prej rreth 240 ml përmban mesatarisht 100 miligramë kafeinë, megjithëse kjo sasi ndryshon sipas llojit të kafesë dhe mënyrës së përgatitjes.
“Për shkak se kafeina është një stimulues, pirja e kafesë në mëngjes ju ndihmon të zgjoheni,” thotë DiMarino. Një nga mënyrat sesi kafeina vepron është duke rritur nivelin e kortizolit në trup.
Kortizoli, kafeina dhe kafja e mëngjesit
Kortizoli, i njohur shpesh si “hormoni i stresit,” është një kimikat që trupi juaj lëshon në situata të rrezikshme. Edhe pse mëngjeset zakonisht nuk janë aq dramatike (edhe për ata që nuk janë persona mëngjesi), kortizoli prodhohet natyrshëm pasi zgjoheni.
“Kortizoli ju ndihmon të bëheni më vigjilentë dhe të ndërgjegjshëm për rrethinën tuaj pas gjumit,” shpjegon DiMarino.
Në përgjithësi, nivelet e kortizolit arrijnë kulmin midis orës 7 dhe 8 të mëngjesit dhe fillojnë të bien gradualisht gjatë ditës, duke arritur nivelin më të ulët gjatë natës. Në këtë mënyrë, kortizoli ndihmon në ruajtjen e ritmit natyror të gjumit dhe zgjimit.
Por nëse pini kafe herët në mëngjes, stimulimi shtesë që jep kafeina mund të rrisë akoma më shumë nivelin e kortizolit, gjë që tek disa persona shkakton nervozizëm apo ankth.
Kafeja në mbrëmje
Pirja e kafesë natën vonë është një tjetër temë e diskutueshme, përveç rasteve kur punoni turnet e vona.
“Kafeina ka një gjysmë jetë që varion nga 2 deri në 10 orë, në varësi të metabolizmit tuaj,” thotë DiMarino. Pra, trupi juaj mund të shpenzojë nga dy deri në dhjetë orë për të eliminuar gjysmën e kafeinës së një filxhani kafeje.
Disa persona kanë një “gjen të kafesë,” i cili i ndihmon ata ta metabolizojnë kafeinën më shpejt. Nëse mund të pini një espresso në orën 10 të mbrëmjes dhe të flini qetë, ka shumë gjasa që trupi juaj ta përpunojë kafeinën më shpejt se të tjerët.
Koha më e mirë për të pirë kafe
Ja çfarë thonë ekspertët për kohën ideale për të shijuar një kafe:
• Kafeja e mëngjesit rrit nivelin e kortizolit, duke ju bërë të ndiheni më të ngarkuar.
• Kafeja e natës mund (ose jo, në varësi të metabolizmit) të ndikojë te gjumi.
Nëse kërkoni një moment perfekt për kafenë tuaj, një filxhan mes orës 9:30 dhe 11:00 të mëngjesit mund të jetë më efektiv. Në këtë periudhë, niveli i kortizolit fillon të bjerë, dhe ndikimi i kafeinës mund të jetë më i dobishëm.
Artikuj të sugjeruar:
