Po bëhet sa vjen e më e vështirë ta mbrojmë këtë Big. Sado që e duam këtë program, s’e mohojmë dot se spektakli i mbrëmshëm ishte supeeer i mërzitshëm. Ndoshta sepse kishim pritshmëri të larta për hyrjen e një personi të caktuar. Ah po, nuk hyri ai personi. Gjithsesi, ne vazhdojmë avazin dhe ja ngjarjet për të cilat do duash të flasësh nesër me kolegët e punës, të renditura kronologjikisht:

#1. Debati G Bani – Valbona – Laert

Lajmi i fundit: Xhibo s’ka më sy për Valbonën, ka nja 5-6 ditë ky muhabet. Por mos u shqetësoni, dhe G Bani për Valbonën tani është thjesht Xha’ Bani. Përsa i përket Laertit, Laerti është Laerti.

Valbona nuk i ndoqi këshillat e të tjerëve për të krijuar një lojë të pavarur pa trekëndëshin e telenovelës që sa vjen e ia shton personazhet. Në vend të kësaj, ajo krijoi një situatë ku e dinte se do i vërdalliste dy djemtë nga vetja.

Kështu, kur Xha’ Bani ta quante “mashtruese” dhe “legene”, ajo do të sigurohej që të bërtiste mjaftueshëm që shpëtimtari dhe xhentili Laert të përplasej kokë më kokë me G Banin, aq sa s’po e kuptonim a donin të griheshin, a të putheshin.

#2. Debati Klajdi – Rozana (Po po, mirë e lexuat)

Në qoftë se menduat se e vetmja gjë që mund ta zgjojë Klajdin është nominimi, keni të drejtë! Mirëpo, e vetmja tematikë që do të bënte sens për debatet e Klajdit do të ishte… e gjetët sërish, buka!

Në një situatë sa tragjike, sa komike, Rozana i përmend Klajdit atë për të cilën e kanë fiksuar të gjithë në fakt, dhe i thotë “të shkojë të hajë bukë, të mos merret me të", sepse sipas saj, sa herë Klajdi është në nominim, do të krijojë situata me Rozanën.

Mirëpo shpërthimi i kësaj here i Klajdit ishte… i paprecedentë, duke përsëritur të njëjtat fjalë si të Jozit nga klipi në dhomën e rrëfimit për Rozanën, dhe duke e quajtur "shtrigë" në mes të prime-t teksa përdor kartën e të varfrit. Shpresojmë që Klajdi thellë-thellë t’i jetë falenderues Rozanës që ia zgjati edhe pak jetën brenda asaj shtëpie, teksa ha në kurriz të njëjtat fjalë të papranueshme (qofshin shpifje ose jo).

#3. Hapim peticion t’u mësojmë kuptimin e fjalës “ordinere” banorëve

Prapë këta do thoni ju? Po pra, prapë s’e mësuan ç’do të thotë ordinere, ose së paku fshihen pas keqkuptimit nga fjala “ordinary” nga anglishtja, që përkthehet i/e zakonshme.

Megjithatë, fjalori shqip thotë: “Dikush a diçka i një niveli të ulët; i pavlerë. Njeri ordiner. Hajdut ordiner.” More vesh Klajdi? Shpresojmë të jetë sqaruar kjo për “BBVA5” tani. 

#4. Drama Egli dhe Gjesti

Gjesti bëri sjelljen tipike të djemve që një ditë të japin shpresë sikur janë të gatshëm të martohen me ty dhe ditën tjetër të lënë pa asnjë shpjegim. E kuptoni sa dërrmuese duhet të ketë qenë për Eglin të ishte aq pranë puthjes një ditë, dhe tjetrën t’i thuhet “Zhduku!” aq pa shpirt.

S’e dimë se energjia e kujt e pushtoi Gjestin në ato momente, ama në dhomën e rrëfimit më vonë u shpreh se në fund të fundit nuk rri dot larg Eglit se “ndjen për atë vajzë”, duke ia gufuar dhe një herë zemrën kësaj së gjorës që me zor po i mban distancë gjithsesi.

Sikleti dhe turpi që ndjente Egli për gjithë situatën, vihej re dhe tek fakti që nuk e përmendte më emrin e Gjestit, por siç ndodh në rastet kur emri i “atij” thjesht tingëllon aq intim, dhe Egli po përdorte përemrat dëftorë: “atij, atë, i/e atij” në vend të emrit të Gjestit.

#5. Eleminohet Bernardi

E dimë që ishte e pritshme. Po e përfshijmë në momentet kyçe për gjyqin që iu bë më pas Gertit, si njeriu që e kishte trajtuar më keq Bernardin brenda shtëpisë, ose më saktë, me fjalët e Nedës: “ishte treguar thellësisht homofob, me mungesë të edukatës qytetare, që ka problem me menaxhimin e urrejtjes”.

Dhe meqë eleminimi i Bernardit, vetëm për Bernardin s’qe, u hap dhe një televotim brenda natës për banorët e preferuar, 3 prej të cilëve, do të kishin ca përfitime.

#6. Surpriza nga babi për Loredanën (dhe Jozin)

Babi i Loredanës, pasi u çmall me të bijën, s’u kursye të shprehte mospëlqimin e tij për Jozin. “Të ka mbuluar ai, të ka vënë perde,” i tha ai Loredanës dhe a ka faj?

Babai i Lorit, i vendosur për t’i çuar gjërat deri në fund, kërkoi dhe një takim me Jozin, i cili s’pati fat me përzgjedhjen e veshjes si për takim të parë me “vjehrrin”.

Takimi ishte siç e do zakoni me vjehrrin, i shkurtër, i sikletshëm dhe pa dhënie dore në fund. Ajo që vlen të thkesohet është se Loredana s’u ndikua fare nga fjalët e të atit, siç ndodh kur refuzon të pranosh një dashuri, dhe ajo u shpreh se nuk ndahet dot nga Jozi.

#7. Debati Gerti – Laerti

Pa hë, na thoni ju, ka njeri nerva të dëgjojë muhabete patriotizmi në 1 të natës? Se këtë nisën prapë Gerti me Laertin. Çudia më e madhe e kësaj është se erdhi dita që t’i thoshte Laerti Gertit “mos përdor fjalë të vështira, se s’të kuptonë njerëzit”. Ironike.

#8. Bllok momentesh që mund të të interesojnë:

- G Bani fitoi të drejtën që nëse merr çmimin e madh, të fitojë 25 mijë euro (nga 5 mijë euro që kishte më parë), meqënëse kreu me sukses një mision nga Vëllai i Madh.

- Laerti fitoi një darkë për kryerjen e misionit të tij, të cilën zgjodhi ta ketë me Valbonën.

- Shejtani i Jozit bën çift Gertin me Rozanën, po këta të fundit s’ia varën.

- Hyjnë tre banorë të rinj: Tiri Gjoci, Krisa Çaushi dhe Indrit Murati.

#9. 3 të preferuarit e publikut përcaktojnë fatet e të tjerëve

3 të preferuarit e publikët u shpallën: G Bani, Gerta, Gjesti, të cilët përveçse kishin imunitet deri në prime-in tjetër, mund të zgjidhnin një tjetër banor me të njëjtin fat si ata dhe zgjodhën respektivisht: Danjën, Klajdin dhe Eglin.

Të tjerët: Valbona, Jozi, Rozana, Aldo, Livia, Loredana, Laerti, Gerti, janë në televotim dhe pyetja kësaj radhe është “Kë doni të largoni?”. Deri atëherë, mirë u takofshim në të tjera dinamika. :)

Copyright Anabel.al / Ndalohet ribotimi pa lejen e redaksisë.