Në prime-in e mbrëmshëm të “Big Brother VIP Albania 4”, produksioni vendosi të tregojë linjën e jetës së Bernardit.

Rrëfimi i Bernardit nisi me të duke treguar se ishte rritur në një familje shumë të dashur me dy prindër që i kishin krijuar një fëmijëri të lumtur. Megjithatë, ai vijoi të tregonte se kishte hasur dhe sfida të mëdha, që nga ngjarja e rëndë e abuzimit seksual në moshë të hershme e deri tek bullizimi dhe mospërfillja e shoqërisë, që çoi më vonë në izolimin e tij.

Berndardi zbuloi se si tragjikisht, në moshën 10-vjeçare ra viktimë e një akti përdhunimi nga fqinji i lagjes së tij, duke u shprehur:

“10 vjeç, në buzë të rrugës teksa po luaja, vjen një fqinj i lagjes dhe më thotë: ‘Pse nuk po luan?’. Më tha ‘Hajde me mua se do të të ndihmoj.’ E ndoqa në shtëpi dhe u futëm në një dhomë gjumi. Më tha ‘Kjo është diçka që do të ta lehtësojë dhimbjen’. Dhe nuk kishte dhimbje më të madhe. Doja vetëm që të largohesha, nuk ktheja dot as kokën, as nuk ulërisja dot. E vetmja gjë që shihja ishin ato hije nëpër mure. Ulërita, qava, iu luta ‘Mos e bëj këtë gjë’.”

Ai vijoi rrëfimin duke treguar se si ngjarja ndikoi në vazhdimësinë e jetës së tij dhe pasojat që ndjeu për vite me radhë, që prej asaj dite që ai vetë e konsideroi si ‘ditën që e ktheu jetën e tij në një ferr të vërtetë’:

“Nuk e kam kuptuar deri në moshën e adoleshencës që ky ishte një abuzim seksual. Pas abuzimit çdo dhimbje që doja të ndaja dhe çdo gjë që doja ta tregoja dhe ta shprehja ishte pothuajse e pamundur nga shantazhet se çdo gjë do ta merrnin vesh prindërit e mi, shoqëria ime. Kam dënuar veten aq shumë sa as nuk di se si ta shpreh. Kjo gjë më bëri të mbyllem në vetvete akoma më shumë. Kisha frikë të shkoja në shkollë, të kthehesha në shtëpi vetëm.”

Rrëfimi i tij vazhdoi me vuajtjen që Bernardi tha se kishte ndjerë gjatë adoleshencës për mënyrën se si e trajtonin në shoqëri, për faktin se ishte 'ndryshe dhe më femëror se djemtë e tjerë'. Ai më pas zbuloi se dhe vetë, vetëm në moshën 37-vjeçare kishte kuptuar dhe pranuar se ishte një burrë homoseksual, rrëfim të cilin e bëri javën e mëparshme brenda shtëpisë.

Bernardi, i cili tanimë zbuloi se është i martuar me një burrë të huaj të quajtur Enam, ka dy vajza nga martesa e tij e parë me një grua angleze, Kimberley dhe Coral, nga e cila u vizitua mbrëmjen e djeshme në Dhomën e Surprizave.

Surprizat nuk patën fund për të, pasi ai mori dhe një letër prej mamasë që ndër të tjera, shprehte në letrën e saj prekëse: “Më fal biri i nënës nëse nuk ishim të zotët për të kuptuar momentet e tua të vështira. Më fal bir që mami nuk t’i ka mjekuar dot plagët që jeta të solli” duke shkaktuar emocione të forta tek Bernardi dhe banorë të tjerë brenda shtëpisë.