Genta Gjalpi, blogerja dhe ish-banorja e “Big Brother 5”, ishte e ftuar në emisionin “UËTËFËË!! show” në Andale Media, ku nën moderimin e Fatosit dhe Artemisës, ajo ndau më shumë detaje nga jeta e saj personale.
Genta së fundmi ka marrë propozimin për martesë nga partneri me të cilin zbuloi se njihet që prej periudhës së pandemisë. Për unazën në gisht që nuk mund të kalonte pa u vënë re, ajo u shpreh se mbartte vlerën 20 mijë euro.
E pyetur nga Fatosi, një ndër moderatorët e emisionit, nëse kishte realizuar ndonjë festë fejese, Genta tregoi:
“Bëra një festë familjare për të kënaqur prindërit më shumë. Unë jam shumë tradicionale, ndaj e doja këtë.”
Për planet e ardhshme për një dasmë, Genta u shpreh optimiste, duke detajuar:
“Do e bëjmë [dasmën]. S’e dimë kur. Dua diçka tradicionale, shumë të madhe, por varet dhe nga mundësitë që do të kemi.”
Nga postimet e saj në rrjetet sociale, Genta mbahet mend për marrëdhënien e ngushtë me gjyshërit e saj, të cilët janë ndarë nga jeta. E pyetur nga moderatorët, Genta pohoi se ndihej e keqardhur që nuk mundi t’i kishte pranë këta dy njerëz të dashur për të, në një gëzim kaq të madh të jetës së saj:
“S’pata fatin t’ia prezantoja gjyshërve [partnerin]. Më ka mbetur peng. Ia kam ndjerë ditën e fejesës mungesën [gjyshit] sepse ishte njeri që i pëlqente kur mblidheshin njerëzit.”
Gjithashtu, përsa i përket marrëdhënieve të këqija vjehrrë-nuse, për Gentën mbeten një mit, pasi ajo u shpreh se eksperienca e saj ka qenë krejt e kundërta:
“Marrëdhënien me vjehrrën e kam shumë të mirë. Kemi bashkëpunuar të dyja palët, po kur gjen vjehrrit e mirë të bëhet puna dhe më e thjeshtë,” tha ajo duke përmbyllur temën e jetës së saj sentimentale, për të cilën gjithmonë ka qëndruar e rezervuar, në respekt të privatësisë së partnerit.
Për të parë episodin me intervistën e plotë, mund të klikoni në videon e mëposhtme:
