Edhe këtë vit, revista e njohur Time vjen me botimin e saj special për “Njeriu i Vitit”, për të vlerësuar figurat më me ndikim për 2024-n. Kjo traditë që daton prej vitit 1927, vijon të rrëmbejë vëmendjen me çmimet e dhëna. Kësaj radhe, mes personave të përzgjedhur, pikaset edhe emri i sipërmarrësit shqiptar Samir Mane, themeluesit dhe Presidentit të Grupit BALFIN.

Donald Trump ishte ai që rrëmbeu çmimin kryesor, “Njeriu i Vitit”, nën motivacionin e “nxitjes së një ndryshimi politik breznor dhe transformimit të rolit të SHBA-s në arenën globale.” Për të, ky është një çmim që merret për herë të dytë, pasi ajo e para u mor në vitin 2016, pas fitores së zgjedhjeve presidenciale amerikane përballë demokrates Hillary Clinton.

Çmime të tjera shkuan për: Lisa Su, Drejtoreshën Ekzekutive të korporatës shumëkombëshe dhe teknologjike Advanced Micro Devices (AMD), si “CEO e Vitit”; Yllin e basketbolit Caitlin Clark si “Atletja e Vitit”; Legjendën e muzikës Elton John sii “Ikona e Vitit”.

Mes emrave të përzgjedhur, revista prestigjioze Time ka vlerësuar rrugëtimin 30-vjeçar të sipërmarrësit Samir Mane, duke e konsideruar “si një histori që reflekton jo vetëm sukses personal, por edhe një angazhim të thellë për të krijuar vlerë të qëndrueshme për ekonomitë dhe komunitetet ku Grupi BALFIN operon.”

Grupi BALFIN është një nga grupet më të mëdha dhe të suksesshme të investimeve, që operon në 11 vende dhe dy kontinente, si: Austri, Shqipëri, Kosovë, Bosnje e Hercegovinë, Maqedoni të Veriut, Kroaci, Zvicër, Holandë, Kanada dhe Shtetet e Bashkuara të Amerikës.