Luigi Mangione mund të ishte personi i fundit që shoqëria apo familja mendonin se do të ishte përfshirë në një krim.
Djali i një familjeje të njohur nga Maryland, i cili mbaroi me rezultatet më të mira të klasës në një shkollë private elitare para se të diplomohej nga një universitet i Ligës "Ivy", dukej se kishte një jetë që shumë e lakmonin dhe asnjë motiv për ta rrezikuar atë, sipas miqve.
Por gjithçka ndryshoi kur ai u arrestua si i dyshuari kryesor për vrasjen e Brian Thompson, drejtorit ekzekutiv të "UnitedHealthcare", i cili u qëllua për vdekje javën e kaluar në New York City.
Megjithatë, 26-vjeçari sipas avokatit të tij nuk do e pranojë akuzën e ngritur.
Motivet e krimit
Sipas një komunikate të organeve të rendit, Mangione dyshohet të jetë motivuar nga mllefi ndaj asaj që ai e quajti “kompani shëndetësore parazitare”. Ai kishte kaluar kohë në një komunitet surfistësh në Hawaii, por ishte larguar për shkak të dhimbjeve të forta në shpinë, thonë ata që e ishin me të sipas mediave ndërkombëtare. Megjithatë, nuk dihet ende deri në çfarë mase problemet e tij shëndetësore ndikuan në pikëpamjet e tij për industrinë mjekësore.
Arrestimi në "McDonald’s"
Pas krimit të dyshuar duket se ai ishte i uritur, ndaj vijoi jetën si normalisht. Ai u arrestua të hënën në një "McDonald’s" në Altoona, Pennsylvania, dhe dyshohet se kishte një armë, municion, disa ID të rreme dhe para.
Mangione gjithashtu kishte një dokument të shkruar që shprehte “urrejtje” ndaj Amerikës korporative dhe përmbante pasazhe të tilla si “sinqerisht, këta parazitë e meritonin këtë”, sipas policisë. Hetuesit thonë se fjalët “refuzo”, “mbro” dhe “heq” ishin shkruar mbi fishekë që u gjetën në vendin e krimit, dhe dyshohet se ato janë një referencë për “tre D-të e sigurimeve” – taktika që përdorin kompanitë për të refuzuar kërkesat e pagesave nga pacientët.
E shkuara dhe familja e tij
Mangione vjen nga një familje në zonën e Baltimore, që është e njohur në fushën e biznesit, duke zotëruar klube kampingu, azil të moshuarish dhe një stacion radio, sipas mediave lokale. Gjyshërit e tij nga ana e babait, Nicholas dhe Mary Mangione, ishin investitor të pasurive të patundshme dhe blenë “Turf Valley Country Club” në vitin 1978 dhe “Hayfields Country Club” në Hunt Valley në vitin 1986.
Menjëherë pas ngritjes së akuzave ndaj Mangione, kushëriri i tij, ligjvënësi republikan i shtetit Nino Mangione, lëshoi një deklaratë duke thënë se familja ishte “shokuar dhe e shkatërruar”.
“Ne lutemi për familjen e Brian Thompson dhe kërkojmë që njerëzit të luten për të gjithë ata që janë të përfshirë”, thuhet në deklaratë.
Thomas Maronick, një avokat që njeh anëtarë të familjes, i tha BBC-së se ishte shokuar nga akuzat.
“Nuk do të mendonit se dikush me privilegje ose mundësi nga një familje që është e njohur për të bërë kaq shumë për komunitetin do të bënte diçka të tillë,” tha ai.
Mangione ndoqi shkollën private "Gilman School" në Baltimore, një shkollë për djem, dhe ishte valedictorian, një titull që i jepet studentit me arritjet më të larta akademike. Një shok klase i tha CBS News se Mangione “nuk kishte asnjë armik” dhe ishte “valedictorian për një arsye”.
Mangione vazhdoi studimet në Universitetin e Pensilvanisë, ku mori diplomë të bachelor-it dhe të masterit në shkencat kompjuterike dhe themeloi një klub për zhvillimin e video-lojërave, sipas shkollës. Një mik që ndoqi universitetin në të njëjtën kohë me Mangione e përshkroi atë si një “person shumë normal” dhe “inteligjent”.
Mangione punoi si inxhinier të dhënash për “TrueCar”, një faqe interneti për shitjen e automjeteve të reja dhe të përdorura, sipas profileve të tij në mediat sociale. Një zëdhënës i kompanisë i tha BBC-së se ai nuk kishte punuar atje që nga viti 2023.
Ai gjithashtu kishte kaluar kohë në një komunitet surfistësh në Hawaii të quajtur "Surfbreak". Sarah Nehemiah, që e njohu atë në atë periudhë, i tha CBS se ai ishte larguar për shkak të dëmtimit të shpinës, i cili ishte përkeqësuar nga surfing-u dhe ecja.
Miqtë kanë thënë për mediat amerikane se ai kishte bërë një operacion në shpinë. Imazhi në sfondin e një llogarie në "X" që dyshohet se i përket Mangione tregon një rreze X të shpinës me pajisje metalike.
